Maharashtra Assembly Interim Budget 2024 : जालना- जळगाव रेल्वेमार्गासाठी 50 टक्के सहभागाची उपलब्धी

Jalgaon News : राज्याच्या अंतरिम अर्थसंकल्पात जळगाव जिल्ह्याच्या दृष्टीने फार मोठी उपलब्धी नसली तरी, जालना- जळगाव रेल्वेमार्गासाठी राज्याचा ५० टक्के आर्थिक सहभाग म्हणून तरतूद करण्यात आली असून हीच एकमेव दिलासादायक बाब आहे.

राज्याचे उपमुख्यमंत्री तथा वित्त व नियोजनमंत्री अजित पवार यांनी चार महिन्यांसाठीचा अंतरिम अर्थसंकल्प विधिमंडळात सादर केला. (50 percent participation achieved for Jalna Jalgaon railway line)

जळगाव व पर्यायाने खानदेशासाठी महत्त्वपूर्ण अशा प्रलंबित कृषी विद्यापीठासह, पशुवैद्यकीय महाविद्यालय, जळगावसाठी विस्तारित एमआयडीसीची घोषणा होणे अपेक्षित होते. मात्र, त्याविषयी कोणतीही घोषणा नाही.

जालना- जळगाव रेल्वेमार्गासाठी राज्याने रेल्वेच्या बरोबरीने ५० टक्के निधीची घोषणा केली आहे. अमळनेरला नुकतेच साहित्य संमेलन झाले, त्यात अजित पवारांनीच साने गुरुजींच्या स्मारकासाठी प्रस्ताव सादर करण्याच्या सूचना केल्या होत्या. (latest marathi news)

त्यानुसार स्मारकाची घोषणा करण्यात आली. मात्र, बहिणाबाई व बालकवी ठोंबरे यांच्या रखडलेल्या स्मारकाविषयी अर्थसंकल्पात उल्लेख नाही.

जळगाव येथे शासकीय वैद्यकीय महाविद्यालयाशी संलग्न प्रत्येकी शंभर विद्यार्थी क्षमतेचे शासकीय परिचर्चा महाविद्यालयाची घोषणा अर्थसंकल्पात करण्यात आली आहे. या मोजक्या दोन- तीन प्रमुख बाबींचा समावेश अर्थसंकल्पात आहे.