Jalgaon Lok Sabha Election : शिरूरच्या मैदानात प्रचारासाठी उतरली ‘मुक्ताईची लेक’; ॲड. रोहिणी खडसेंचा शिक्रापूरला सभांचा धडाका

Jalgaon News : पुणे जिल्ह्यातील शिरूर लोकसभा मतदारसंघात डॉ. अमोल कोल्हे व शिवाजीराव अढळराव पाटील यांच्यात होत असलेल्या सामन्यात मुक्ताईच्या लेकीने डॉ. कोल्हे यांच्या प्रचारार्थ खानदेशातील रहिवास भागात प्रचाराची धुरा हाती घेतलीय. ती राष्ट्रवादी काँग्रेस शरदचंद्र पवार पक्षाच्या महिला आघाडीच्या प्रदेशाध्यक्षा ॲड. रोहिणी खडसे यांनी...(Jalgaon Adv. Rohini Khadse)

ॲड. खडसे यांनी शिरूर मतदारसंघात शिक्रापूर येथे डॉ. कोल्हे यांच्या प्रचारार्थ धडाकेबाज बॅटिंग सुरू केली आहे. सत्ताधाऱ्यांच्या चुकीच्या धोरणांमुळे देशासमोर महागाई, बेरोजगारी, महिला, शेतकऱ्यांचे प्रश्न गंभीर बनल्याचा घणाघात ॲड. रोहिणी खडसे यांनी केला.

एकीकडे त्यांचे वडील ज्येष्ठ नेते एकनाथ खडसे भाजपत परतत असताना कन्या रोहिणी यांनी आपल्या भूमिकेवर ठाम राहत शरद पवारांसोबत राहण्याचा निर्धार तर केलाच, शिवाय आपल्या पदाला न्याय देत पक्षाच्या उमेदवारांसाठी त्या राज्यभर दौरे करीत आहेत. (Latest Marathi News)

शिक्रापूर येथे कॉर्नर सभा

राष्ट्रवादी काँग्रेस शरदचंद्र पवार पक्ष महिला आघाडीच्या प्रदेशाध्यक्ष रोहिणी खडसे यांनी पुणे जिल्ह्यातील शिक्रापूर येथे खानदेश-विदर्भातून शिरूर लोकसभा मतदारसंघात स्थायिक झालेल्या नागरिकांची कॉर्नर सभा आणि भेटीगाठी घेऊन डॉ. कोल्हे यांना निवडून देण्याचे आवाहन केले.

या वेळी उपस्थितांशी संवाद साधताना त्या म्हणाल्या, की यंदाची लोकसभेची निवडणूक निर्णायक असून, देशाची दिशा ठरवणारी आहे. सत्ताधाऱ्यांच्या परवानगीने आणि सहकार्याने महाराष्ट्रातील मोठमोठे उद्योग गुजरात व इतरत्र राज्यात पळवून नेले जात आहेत.

त्यामुळे इथल्या स्थानिक युवकांचा रोजगार हिरावला गेला आहे. मोठे उद्योग बाहेरील राज्यात गेल्याने मोठ्या उद्योगांशी निगडित छोटे उद्योग करणारे व्यावसायिक देशोधडीला लागले आहेत, अशा सरकारला धडा शिकविण्यासाठी जनतेने सज्ज व्हावे, असे आवाहन त्या करीत आहेत.