Jalgaon News : जळगाव बदलीसाठी सहाय्यक निरीक्षकाने उचलले टोकाचे पाऊल

Jalgaon News : जळगाव जिल्ह्यातील मूळ रहिवासी सहाय्यक पोलिस निरीक्षकाने मुंबईत वाकोला शासकीय पोलिस वसाहती छतावर जाऊन गळफास घेतल्याची घटना मंगळवार (ता.२८) सायंकाळी घडली. प्रल्हाद बनसोडे (वय ४२) असे आत्महत्या केलेल्या अधिकाऱ्याचे नाव आहे.

बनसोडे आजारपणामुळे त्रस्त असल्याने मुळगाव जळगाव जिल्ह्यात बदलीसाठी प्रयत्नशील असल्याची माहिती समोर आली आहे. (Assistant Inspector took extreme step for Jalgaon transfer)

बनसोडे यांना जळगावला बदली हवी असल्याने अधिवेशन सुरु असताना त्यांनी टोकाचा निर्णय घेतल्याने विधान सभेत याचे पडसाद उमटण्याची शक्यता वर्तवली जात आहे. वाकोला पोलिस ठाण्यात कार्यरत सहायक निरीक्षक प्रल्हाद बनसोडे (वय-४२)यांची जळगावमधून मुंबईत बदली झाली होती.

कालिना बॉम्ब शोध पथकात ते कार्यरत होते. पोलीस वसाहतीच्या इमारतीमधील पहिल्या मजल्यावर बनसोडे कुटुंबासह वास्तव्यास होते. मंगळवार(ता.२८) रोजी संध्याकाळी पाचच्या सुमारास वसाहतीच्या टेरेसवर जाऊन त्यांनी जीवन संपविले.

सुरक्षारक्षक अचानक छतावर गेल्यानंतर बनसोडे यांचा मृतदेह त्याला दिसला. त्याने स्थानिकांना माहिती देत पोलिसांना कळवले. प्रल्हाद बनसोडे यांच्या आत्महत्या प्रकरणी वाकोला पोलिसांत नोंद करण्यात आली आहे. (latest marathi news)