जळगाव : व्याजाच्या पैशांसाठी विवाहितेसह वडीलांना बेदम मारहाण

जळगाव : शहरातील बालाजी मंदिर परिसरात उसनवारीच्या पैशांच्या वादातून विवाहितेसह तिच्या वडिलांना मारहाण केल्याची घटना समोर आली आहे. शनिपेठ पोलिसात याप्रकरणी चार संशयितांविरुद्ध गुन्हा दाखल झाला आहे. व्याजाच्या पैशांच्या वसुलीवरुन हा वाद झाल्याची सांगण्यात आले. (Latest Marathi News)

जळगाव शहरातील रथचौक परिसरात ज्योती अशोक साळुंखे (वय ४०) कुटुंबासह वास्तव्यास आहेत. ज्योती साळुंखे यांनी किरण लिलाधर सैंदाणे (रा. जैनाबाद) यांची बहिण गुड्डी कैलास इंगळे हिच्याकडून वीस हजार रुपये उसनवार घेतले आहे. हे पैसे व्याजासह परत करावे, या कारणावरुन किरण सैंदाणे, सागर सैंदाणे, कल्पना लिलाधर सैंदाणे व शेखर हरी सपकाळे (सर्व रा. जैनाबाद) अशा चार संशयितांनी मंगळवारी (ता. १६) सायंकाळी सहा वाजेच्या सुमारास बालाजी मंदिर परिसरातील पुलावर ज्योती साळुंखे यांना मारहाण केली. यादरम्यान किरण याने ज्योती यांच्या पोटावर पाठीवर दुखापत केली.

यावेळी ज्योतीचे वडील विश्वास भोजू रोकडे यांनाही कल्पना सैंदाणे यांनी शिवीगाळ करत मारहाण केली. घटनेत ज्योती साळुंखे जखमी झाल्या असून त्यांच्या तक्रारीवरुन किरण सैंदाणे, सागर सैंदाणे, कल्पना लिलाधर सैंदाणे व शेखर हरी सपकाळे (सर्व रा. जैनाबाद) अशा चौघांविरुद्ध गुन्हा दाखल झाला आहे. पुढील तपास पोलिस नाईक प्रकाश पाटील करत आहेत.