जळगाव : भाजप गटनेतेपदाचा निर्णय विभागीय आयुक्तांनी घ्यावा; औरंगाबाद खंडपीठ

जळगाव : महापालिकेत भाजपच्या गटनेतेपदाचा निर्णय नाशिक विभागीय आयुक्तांनी दहा आठवड्यात घ्यावा, असा आदेश मुंबई उच्च न्यायालयाच्या औरंगाबाद खंडपीठाने घेतला आहे. नगरसेवक अपात्रतेसोबत सुनावणी घेऊन दहा आठवड्यात निर्णय घ्यावा, असेही आदेश देण्यात आले आहेत. (Latest Marathi News)

जळगाव महापालिकेत भाजपच्या ५७ पैकी २७ नगरसेवकांनी फुटून वेगळा गटस्थापन केला होता. त्यांनी महापौर निवडणुकीत शिवसेनेच्या उमेदवाराला पाठिंबा दिला होता. महापालिकेत भाजपच्या नगरसेवकापैकी दोन तृतिअंश नगरसेवक आमच्या गटात असल्यामुळे आम्हीच भाजप आहोत. आमचे गटनेते दिलीप पोकळे आहेत, असा दावाही त्यांनी केला होता. त्यावर भाजपचे गटनेते भगत बालाणी यांनी मुंबई उच्च न्यायालयाच्या औरंगाबाद खंडपीठात याचिका दाखल केली होती.

महापालिकेत भाजपचा गटनेता मीच आहे, असा दावा दाखल केला होता. त्यावर फुटीर गटाचे नेते ॲड. दिलीप पोकळे यांनीही आपणच गटनेता असल्याचा दावा केला होता. त्यावर शुक्रवारी (ता. १२) मुंबई उच्च न्यायालयाच्या दोन न्यायाधीशांच्या खंडपीठापुढे सुनावणी झाली. याप्रकरणी दिलेल्या निर्णयात त्यांनी म्हटले आहे, की गटनेत्याबाबतचा निर्णय नाशिक विभागीय आयुक्तांनी घ्यावा. नगरसेवक अपात्रतेप्रकरणी जी सुनावणी सुरू आहे; त्यासोबतच याचीही सुनावणी घेऊन दहा आठवड्यात त्याबाबत निर्णय घ्यावा.

या प्रकरणी याचिकाकर्ते भगत बालाणी यांच्यातर्फे शैलेश ब्रम्हे, दिलीप पोकळे यांच्यातर्फे ॲड. देवदत्त पालोदकर, महापालिका आयुक्तातर्फे ॲड. संदेश पाटील, महापौर जयश्री महाजन यांच्यातर्फे ॲड. महेश देशमुख व नाशिक विभागीय आयुक्तांतर्फे ॲड. काळे यांनी काम पाहिले.

''आमचे नेते राज्याचे मंत्री गुलाबराव पाटील व गिरीश महाजन हे आहेत. याप्रकरणी ते जो निर्णय घेतील तो आम्हास मान्य राहील.'' - ॲड. दिलीप पोकळे, गटनेते बंडखोर.