Jalgaon Crime news : मेहुणबारे परिसरात 3 हातभट्टींवर कारवाई; एक लाख 15 हजारांचा ऐवज जप्त

मेहुणबारे : लोकसभा निवडणुकीच्या पार्श्वभूमीवर कायदा व सुव्यवस्था अबाधित ठेवण्यासाठी पोलिसांकडून अवैध धंद्यांवर कारवाईचा बडगा उगारला जात आहे. मेहुणबारे पोलिसांनी केलेल्या कारवाईत पोहरे आणि खेडी भागात दोन हॉटेलांवर छापा टाकून देशी व विदेशी दारू विक्रीचा प्रकार उघडकीस आणला. (Jalgaon Crime Action taken on 3 and furnaces in Mehunbare area)

तर सायगाव येथे दोन व रहिपुरी येथे एक, अशा तीन हातभट्ट्या उद्धवस्त केल्या. या कारवाईत पोलिसांनी सुमारे एक लाख १५ हजार रुपयांचा ऐवज जप्त केला. खेडी ते दस्केबर्डी हॉटेल जय मल्हारमध्ये देशी व विदेशी दारूची विक्री सुरू होती. सोमवारी (ता. २२) रात्री नऊला पोलिसांनी छापा टाकून दोन हजार २८० रुपयांच्या १८ देशी दारूच्या बाटल्या जप्त केल्या.

याप्रकरणी किशोर रावते याच्याविरुद्ध गुन्हा दाखल झाला आहे, तर दुसरी कारवाई खेडगाव-पोहरे रस्त्यावरील हॉटेल राजेश्वरीवर करण्यात आली. राकेश माळी बेकायदा देशी व विदेशी दारू विक्री करताना मिळून आला. त्याच्याकडून दोन हजार ४३० रुपयांच्या २० दारूच्या बाटल्या जप्त करण्यात आल्या.

रहिपुरीत रेल्वे पुलाखालीच हातभट्टी

हॉटेलांमध्ये देशी व विदेशी दारूची बेकायदा विक्री सुरू असताना, अवैध हातभट्ट्यांनाही उत आला आहे. एकाच दिवसात पोलिसांनी तीन ठिकाणी हातभट्ट्यांवर छापे टाकले. त्यात रहिपुरी येथे चक्क रेल्वे पुलाखाली गिरणा नदीकाठावर हातभट्टी आढळून आली.

भावडू नाईक याची ही हातभट्टी होती. तेथून पोलिसांनी १२ हजार २०० रुपयांचे दारू तयार करण्याचे कच्चे व पक्के रसायन जप्त करून ते जागीच नष्ट केले. सायगाव (ता. चाळीसगाव) शिवारात केटी वेअर नाल्याच्या झुडपातच हातभट्ट्या पोलिसांना आढळून आल्या. त्यात समाधान पवार याच्या हातभट्टीवरून ३९ हजार ४०० रुपयांचे कच्चे व पक्के रसायन.

तर अशोक सोनवणे याच्या हातभट्टीवरून ५८ हजार ७०० रुपयांचे कच्चे व पक्के रसायन, दारू जप्त करून ते जागीच नष्ट केले. दोन हॉटेलांमध्ये देशी व विदेशी दारू विक्री, तर तीन ठिकाणी हातभट्टीची दारू जप्त, असा सुमारे एक लाख १५ हजार १० रुपयांची दारू व रसायन पोलिसांनी जप्त केले. या प्रकरणी पाचही गुन्ह्यांत संशयितांविरोधात मेहुणबारे पोलिसांत गुन्हा दाखल झाला आहे.