जळगाव जिल्ह्यात कोरोनाचा आलेख वाढताच

जळगाव : जिल्ह्यात कोरोना संसर्गाचे प्रमाण कायम असून, रुग्णसंख्येचा आलेखही वाढताच आहे. रविवारी (ता. २३) जिल्ह्यात नव्याने ३३८ रुग्णांची भर पडली, तर दिवसभरात २२१ रुग्ण बरे झाले. चिंतेची बाब म्हणजे आयसीयूतील रुग्णांची संख्या आता १६वर पोचली आहे.(Jalgaon Corona update)

जळगाव जिल्ह्यात तिसऱ्या लाटेतील कोरोना संसर्गाचा वेग चांगलाच वाढला आहे. जळगाव व भुसावळवरती वाढती रुग्णसंख्या आता ग्रामीण भागातही वाढू लागली आहे. रविवारी ॲन्टिजेन व आरटीपीसीआर अशा दोन हजार ७३१ चाचण्यांचे अहवाल प्राप्त झाले. पैकी ३३८ जणांचे अहवाल पॉझिटिव्ह आढळून आले. दिवसभरात २२१ रुग्ण कोरोनामुक्त झाले. त्यामुळे जिल्ह्यातील सक्रिय रुग्णांची संख्या तीन हजार २४४ झाली आहे. पैकी ५९ रुग्णांमध्येच लक्षणे असून, उर्वरित तीन हजार १८५ रुग्ण लक्षणेविरहित आहेत. सध्या ७२ रुग्णांवर कोविड केअर सेंटरमध्ये उपचार सुरू असून, उर्वरित तीन हजार ११३ रुग्ण गृहविलगीकरणात आहेत.

गंभीर रुग्ण वाढले

लक्षणे नसलेल्या रुग्णांचे प्रमाण ९५ टक्क्यांहून अधिक असले तरी रविवारी गंभीर रुग्णांची संख्या वाढल्याने चिंता निर्माण झाली आहे. रविवारी आयसीयूत १६ रुग्ण, तर ऑक्सिजनवर सहा रुग्ण होते.

असे आढळले रुग्ण

जळगाव शहर ११८, जळगाव ग्रामीण ६, भुसावळ ८७, अमळनेर २०, चोपडा २६, पाचोरा २, भडगाव ५, धरणगाव १३, यावल ६, जामनेर ८, रावेर ३, चाळीसगाव २५, मुक्ताईनगर ५. बोदवड, पारोळा व एरंडोल तालुक्यात रविवारी एकही रुग्ण समोर आला नाही.