जळगाव : जिल्ह्यात विशेष मतदार नोंदणी मोहीम

जळगाव : जिल्हा प्रशासनाने निवडणूक आयोगाच्या सूचनेनुसार १ नोव्हेंबरला छायाचित्रासह मतदार यादी जाहीर केली आहे. त्यात, जिल्ह्यात ३४ लाख ४१ हजार ४२१ मतदार आहेत. १७ लाख ८८ हजार १९ पुरुष तर १६ लाख ४५ हजार २७० महिला मतदार आहेत. आयोगाच्या सूचनांनुसार मतदारांना आपले नाव, पत्ता, फोटो पाहून त्यातील त्रुटी काढण्यासाठी नोव्हेंबर महिन्याचा कालावधी दिला आहे. यात मतदारांना तहसिल कार्यालय, ग्रामपंचायतीत जाऊन मतदार याद्या पाहून आपल्या नावातील चुका काढता येतील. तर नवमतदारांसाठी चार दिवस नवमतदार म्हणून नाव नोंदविण्याची मोहीम राबविली जाणार आहे.

पाच जानेवारी २०२२ ला अंतिम मतदार यादी जाहीर होईल. ती आगामी निवडणुकांसाठी ग्राह्य धरली जाणार आहे. ज्या मतदारांची नावे दुबार असतील त्यांना एकाच ठिकाणी नावे ठेवण्यासाठी अर्ज करावयाचा आहेत. ज्यांच्या नावात, फोटोत दुरुस्त्या आहे, अशांनाही त्या दुरुस्त करता येणार आहे. ज्या राजकीय पक्षांना मतदार याद्यांवर हरकती, दावे दाखल करावयाचे आहेत, त्यांना ते करण्यासाठी मतदार याद्या जाहीर करण्यात आल्या आहेत.

मतदारयादी पुनरीक्षण असे होईल

मतदार यादीवर दावे, हरकतीचा कालावधी : १ ते ३० नोव्हेबर

विशेष मोहिमांचा कालावधी : १३, १४, २७, १८ नोव्हेंबर

दावे व हरकती निकालात काढणे : २० डिसेंबर

मतदार यादीची अंतिम प्रसिद्धी करणे : ५ जानेवारी २०२२

फॉर्म - नमुना नं. ६ - नव्याने मतदार नोंदणी करणे.

फॉर्म - नमुना नं. ७ - मयत मतदार, स्थलांतरित मतदार

फॉर्म - नमुना नं. ८ - मतदार यादीतील नावांची किंवा तपशिलाची दुरुस्ती

फॉर्म - नमुना नं. ८ अ - मतदार संघामध्ये स्थलांतर झाले असल्यास नाव नोंदणीकरिता

मतदारसंघानुसार मतदार असे

चोपडा ३ लाख १४ हजार ३१८

रावेर २ लाख ९२ हजार ५४२

भुसावळ ३ लाख ५ हजार ८५२

जळगाव शहर ३ लाख ८४ हजार ५६

जळगाव ग्रामीण ३ लाख ९ हजार ८६६

अमळनेर २ लाख ९५ हजार ४५९

एरंडोल २ लाख ७९ हजार ८३८

चाळीसगाव ३ लाख ५४ हजार १७०

पाचोरा ३ लाख ११ हजार ९२४

जामनेर ३ लाख ७ हजार ३८

मुक्ताईनगर २ लाख ८६ हजार ३५८

एकूण ३४ लाख ४१ हजार ४२१