जळगाव : सावद्यात ५० टक्के जागा महिला राखीव

सावदा : पालिकेच्या २०२२ च्या सार्वत्रिक निवडणुकीसाठी एकूण प्रभाग १० आणि द्वीसदस्यीय पद्धतीनुसार प्रत्येक प्रभागात ‘अ’ आणि ‘ब’ अशा दोन जागा मिळून २० जागांसाठी सोमवारी आरक्षण सोडत काढण्यात आली. त्यात ५० टक्के धोरणानुसार २० पैकी निम्मे १० जागा या महिलांसाठी आरक्षित करण्यात आल्या आहेत. तर इतर अनुसूचित जातीसाठी १ महिला राखीव आणि एक जागा ही महिला आणि पुरुषासाठी तर एक जागा अनुसूचित जाती जमाती महिला व पुरुषांसाठी राखीव आणि उर्वरीत ८ जागा या सर्वसाधारण गटासाठी आहेत. सर्वोच्च न्यायालयाच्या आदेशानुसार इतर मागासवर्गासाठी कोणतेही आरक्षण नसल्याने या निवडणुका या ठरल्याप्रमाणे ओबीसी राखीव जागांशिवाय होणार आहेत.

पालिका कार्यालयात सोमवारी सकाळी अकराला प्रांताधिकारी तथा प्रशासक कैलास कडलग तर मुख्याधिकारी किशोर चव्हाण यांनी आरक्षण सोडतीची प्रक्रिया पार पाडली. प्रभाग क्रमांक पाच ‘अ’ या जागेसाठी आरक्षण सोडत काढण्यात आली. लहान मुलाच्या हस्ते चिठ्ठी काढण्यात आली. ही जागा अनुसूचित जाती महिलांसाठी राखीव निघाली. या वेळी प्रशासन अधिकारी सचिन चोळके, वरिष्ठ लिपिक सतीश पाटील आदी उपस्थित होते.

चुरशीच्या होणार लढती?

वीसपैकी आधीच १० जागा या महिलांसाठी राखीव असल्याने त्या जागी पुरुष निवडणूक लढवू शकत नाहीत. तर उर्वरित १० जागा या सर्वसाधारण गटासाठी आहेत. अर्थात या जागांवर पुरुष आणि महिला सुद्धा निवडणूक लढवू शकतात. त्यामुळे सर्वसाधारण जागांमध्ये निवडणूक लढविणाऱ्यांची भाऊगर्दी अधिक होईल आणि त्यामुळे या जागांवर अधिक चुरस निर्माण होईल, हे मात्र नक्की यात शंकाच नाही.