जळगाव महापालिका परिसर ‘भंगार मुक्त’; बॅनरचे ग्रहण अखेर सुटले

जळगाव : महापालिका इमारतीच्या मागील भागात अतिक्रमण निर्मूलन विभागाने जप्त केलेल्या टपऱ्या, बॅनर्स ठेवण्यात आले होते. त्यामुळे या ठिकाणाला ‘भंगार बाजाराचे’ रूप आले होते. महापालिकेने या टपऱ्या तसेच बॅनरचा भंगारात लिलाव केला. त्यामुळे हे सर्व त्या ठिकाणाहून हलविण्यात येत असून महापालिका परिसर आता ‘भंगार मुक्त’ होणार आहे. (Latest Marathi News)

महापालिकेची सतरा मजली इमारत ही शहराची शान समजली जाते. परंतु महापालिकेच्या अतिक्रमण निर्मूलन विभागाने याच सतरा मजली इमारतीच्या मागील भागात अतिक्रमणात जप्त केलेल्या टपऱ्या, बॅनर ठेवले होते. त्यामुळे या ठिकाणचा परिसर अत्यंत अस्वच्छ दिसत होता. पावसाळ्यात या ठिकाणी पाणी साचल्यामुळे मच्छरांचा मोठा प्रार्दुभाव झाला होता. त्यामुळे त्याचा परिसराला धोका निर्माण झाला होता. हे भंगार तातडीने हटविण्यात यावे, अशी मागणी नागरिकांकडून करण्यात येत होती. मात्र महापालिका प्रशासन त्याकडे दुर्लक्ष करीत होते.

अखेर भंगाराच्या निविदा

प्रशासनाने नागरिकाच्या आरोग्याची दखल घेऊन जप्त करण्यात आलेल्या टपऱ्या व बॅनर भंगारात विकण्याचा निर्णय घेतला. त्यासाठी त्याच्या निविदा मागविल्या. त्यामधून एका निविदेला मंजुरी देवून हे सर्व भंगारात काढण्यात आले. मक्तेदाराने याच सतरा मजलीच्या आवारात गॅस कटरच्या साह्याने टपऱ्या तोडून सर्व भंगार एकत्र केले आहे. आता हे सर्व भंगार हटविण्यात येत आहे.

भंगार मुक्त पण...

जप्त केलेल्या अतिक्रमित टपऱ्या व बॅनर्सचे भंगार आता हटविण्यात येत आहे. त्यामुळे आता परिसर स्वच्छ दिसणार आहे. शिवाय सतरा मजली इमारतीची शान ही कायम राहणार आहे. परंतु आता पुन्हा अतिक्रमण विभागाने या परिसरात जप्त केलेल्या टपऱ्या व बॅनर्स टाकू नये. याबाबत अधिकाऱ्यांनी त्यांना कडक सूचना द्याव्यात, अशी मागणीही जनतेकडून करण्यात येत आहे.