Jalgaon News : आर्थिक टंचाईने त्रस्त तरुण शेतकऱ्याने मृत्यूला कवटाळले

जळगाव : कंडारी (ता.जळगाव) येथील अरुण रामकृष्ण कोळी (३४) या तरुण शेतकऱ्याने वाघूर धरणाच्या भिंतीलगत झाडाला गळफास घेत आत्महत्या केल्याची घटना घडली. अडीच एकर शेतात कापूस लावलेला असून आर्थीक परिस्थीती जेमतेम असलेल्या या शेतकऱ्यावर नेमके कर्ज किती होते याची माहितीही कुटूंबीयांना नाही.

पोलिसांनी दिलेल्या माहिती नुसार, कंडारी येथे अरूण रामकृष्ण कोळी हे तरुण शेतकरी पत्नी वंदना व तीन मुलींसह वास्तव्यास होते. गुरुवारी (ता. १) सकाळी अकराच्या सुमारास घरातून अरूण कोळी शेताच्या दिशेने निघून गेले. रात्री उशिरापर्यंत ते घरी न आल्यामुळे त्यांचे काका बापू कोळी चुलत भाऊ विनोद कोळी यांच्यासह नातेवाईक परिसरातील जंगलात शोध घेण्यास निघाले होते.

वाघूर धरणाच्या परिसरात शोध घेतल्यावर याठिकाणी धरणाच्या भिंतीला लागून एका झाडाला अरूणचा मृतदेह गळफास घेतलेल्या अवस्थेत आढळून आला. तत्काळ नशिराबाद पोलिसांना घटनेची माहिती देण्यात आली. अरुण यांचा मृतदेह जिल्हा रूग्णालयात विच्छेदनानंतर नातेवाईकांनी अंत्यसंस्कार केले. नशिराबाद पोलिसांत नोंद करण्यात आली आहे.

आर्थिक अडचण आणि कर्ज

अरुण कोळी यांच्याकडे अडीच एकरच शेती असून कापूस लावला आहे. अनेक दिवसांपासून ते अर्थिक अडचणीत होते, त्यात लहरी हवामानामुळे शेती उत्पन्नाचा भरवसा नाही. प्रचंड मेहनत करूनही कुटूंब पोसणंही अशक्य होत नसल्याने ते तणावात राहायचे. अरुण यांनी नेमके कोणाकडून कर्ज, हात उसनवारीवर पैसे घेतले हे अद्याप कुटूंबियांनाही सांगता येणे अशक्य आहे. अरुण कोळी यांना तीन मुली असून लहान मुलगी अवघी सहा महिन्यांचीच आहे.