Jalgaon Water Shortage: जिल्ह्याच्या पाणीपातळीत दीड ते दोन मीटर घट! भूजल सर्वेक्षण विभागाचा अहवाल; कडक उन्हाळ्याचा परिणाम

Jalgaon Water Shortage : यंदाच्या उन्हाळ्यात तापमानाने ४७ अंश पार केले होते. मे महिना सर्वाधिक तापमानाचा गेला. याचा परिणाम भूगर्भातील पाणीपातळीवर होऊन जिल्ह्यातील अनेक भागांतील पाणीपातळीत दीड ते दोन मीटरने घट झाली आहे, असा अहवाल भूजल सर्वेक्षण विभागाने दिला आहे.

यावर पावसाचे पाणी जमिनीत मुरविणे, झाडे लावणे, सर्वांनीच पाण्याची बचत करणे, या उपाययोजना असल्याचे सांगण्यात आले. यावल, चाळीसगाव, अमळनेर, धरणगाव तालुक्यांत सर्वाधिक पाणीपातळीत घट झाली आहे. (Jalgaon One half to two meter drop in water level of district)

जिल्ह्यात मे महिन्यात सर्वांधिक तापमान होते. यामुळे नागरिकांच्या जीवाची लाहीलाही झाली. सर्व बाजारपेठा, उद्योगांवर अधिक तापमानाचे सावट होते. ‘दिवसा सामसूम अन्‌ रात्री उशिरापर्यंत गर्दी’, असे बाजारपेठेतील चित्र होते. टंचाईग्रस्त भागांत पाण्याचे टँकर, शहरात पाणी बॉटल, पाण्याचे जारला अधिक मागणी होती.

जिल्ह्यात एकूण ९४ गावांत पाणीटंचाई जाणविली. त्या गावांत ११३ टँकर सुरू करून नागरिकांची पाण्याची तहान भागविण्याचे जिल्हा प्रशासनाने प्रयत्न केले. टंचाई निवारणार्थ १६६ गावांत १८६ विहिरी अधिग्रहित केल्या आहेत. अजून पावसाळा हवा तसा सुरू झालेला नाही. यामुळे आगामी काळात पाणीटंचाईची गावे वाढण्याची चिन्हे आहेत. (latest marathi news)

भूजल सर्व्हेक्षण विभागानुसार तालुकानिहाय पाणीपातळीतील घट अशी

तालुका--मीटरने घट

यावल--२.१७

चाळीसगाव--२.१५

अमळनेर--१.९४

धरणगाव--१.९७

रावेर--०.५९

मुक्ताईनगर--०.५१

भुसावळ--०.०७

जामनेर--०.९५

बोदवड--१.९०

जळगाव--०.७३

एरंडोल--०.९८

चोपडा--०.६१

पारोळा--०.५८

पाचोरा--०.७४

भडगाव--१.४२