Jalgaon Lok Sabha Constituency : दुसऱ्यांच्या कुटूंबाबद्दल न बोलण्याची भूमिका मोदींनी सोडली, मात्र आपण सोडणार नाही : शरद पवार

Jalgaon Lok Sabha Constituency : दुसऱ्यांच्या कुंटूंबाबद्दल बोलणाऱ्या नरेंद्र मोदी यांनी कुठे कुटूंब सांभाळलं, त्यांची कौटुंबिक स्थिती चिंताजनक आहे. परंतु त्याबाबत मी बोलू इच्छित नाही, दुसऱ्याच्या व्यक्तिगत जीवनाबद्दल न बोलण्याची भूमिका त्यांनी सोडली असली तरी आपण ती सोडणे योग्य नाही, असे मत राष्ट्रवादी कॉंग्रेस पक्ष-शरदचंद्र पवार पक्षाचे अध्यक्ष शरद पवार यांनी व्यक्त केले. जळगाव येथे पत्रकारांशी ते बोलत होते. (Modi gave up his stance of not talking about other people families but we will not give up )

पंतप्रधान नरेंद्र मोदी यांनी शरद पवार यांच्याबाबत आपलं कुटूंब सांभाळू न शकणारे देश काय सांभाळणार अशी टीका एका मुलाखतीत केली होती. त्याबाबत विचारलेल्या प्रश्‍नााला उत्तर देतांना शरद पवार यांनी दुसऱ्याच्या व्यक्तीगत जीवनाबद्दल मोदी बोलत असले तरी आपण बोलणार नाही असे मत व्यक्त केले.

मोदींबद्दल जनतेत आस्था नाही

पंतप्रधान नरेंद्र मोदी यांच्याबाबतीत बोलतांना ते म्हणाले, की पंतप्रधान नरेंद्र मोदी यांच्याबाबतीत जनतेत सन २०१४ मध्ये जी आस्था होती ती आता राहिलेली नाही. आता परिस्थिती वेगाने बदलते आहे. त्यांनी अनेक बेछूट विधाने केली आहेत. ज्या गोष्टी पेलविल्या जात नाहीत, त्या सुध्दा ते बोलले आहेत. त्यामुळे जनतेचा त्यांच्यावरील विश्‍वास संपलेला आहे. आज शेतकरी वर्ग अस्वस्थ आहे, प्रचंड नाराज आहेत. त्यांच्या नाराजीची किंमत त्यांना मोजावी लागणार आहे. (latest marathi news)

मोंदीनाच जिंकण्याचा विश्‍वास नाही

नरेंद्र मोदी हे महाराष्ट्रात घेत असलेल्या सभांबाबत बोलतांना शरद पवार म्हणाले की, पंतप्रधान मोदी यांना महाराष्ट्रात पूर्वीसारखे यश मिळेल याचा विश्‍वास नाही त्यामुळे ते पुन्हा-पुन्हा महाराष्ट्राचा दौरा करीत आहेत. यापूर्वींच्या पंतप्रधानानी असे कधी केल्याचे आठवत नाही.

महाविकास आघाडीला मोठे यश

राज्यात महाविकास आघाडीच्या यशाबाबत बोलतांना शरद पवार म्हणाले, की आजची परिस्थती महाविकास आघाडीला अनुकूल दिसत आहे. गेल्यावेळी राज्यात कॉंग्रेसला एक, आम्हाला चार व एमआयएमला एक अशा सहा जागा विरोधकांना मिळाल्या होत्या. यावेळी कॉंग्रेसला दहा तर आम्हाला आठ ते नऊ जागा मिळतील असा विश्‍वास आहे.

यावेळचे चित्र आणि मागचे याचे चित्र यात जमीन आसमानचा फरक आहे. भाजपने चारशे पारचा दिलेला नारा आता मागे घेतला असून ते २०० पर्यंत आलेले आहेत, निवडणूका पूर्ण होईपर्यंत ते आणखी खाली येतील असे चित्र आहे.