भुसावळ : अवैधरीत्या शस्त्र वापरावर करडी नजर

भुसावळ : शहरासह परिसरातील शस्त्र तस्करीला आळा घालण्यासाठी उपविभागीय पोलिस अधिकारी सोमनाथ वाकचौरे यांनी प्रयत्न सुरू केले आहेत. त्यामुळे रेकॉर्डवरील गुन्हेगारांची शनिवारी (ता. २९) शहर पोलिस ठाण्यात ओळखपरेड घेण्यात आली. या वेळी शहर पोलिस ठाणे हद्दीतील ११ तर बाजारपेठ पोलिस ठाणे हद्दीतील २१ याप्रमाणे एकूण ३२ संशयितांची हजेरी घेण्यात आली.

जिल्ह्यात गेल्या काही दिवसांपासून अवैधरित्या शस्त्र तस्करीच्या घटना वाढल्याचे चित्र आहे. अनेक ठिकाणी गावठी कट्टे जप्त करण्यात आले आहेत. याला आळा घालण्यासाठी शनिवारी (ता. २९) सकाळी साडेअकरा ते दुपारी अडीचच्या दरम्यान भुसावळ शहर पोलिस ठाणे, बाजारपेठ पोलिस ठाणे यांच्या हद्दीतील जबरी चोरी त्याप्रमाणेच ज्या संशयितांकडे गावठी कट्टा आणि हत्यारे मिळून आली, अशा संशयितांना बोलावून चौकशी करण्यात आली. या संशयितांकडून इंट्रोगेशन फॉर्म भरून घेण्यात आले. याशिवाय त्यांच्याकडून शहरातील अन्य सक्रिय असणाऱ्या गुन्हेगारांची देखील विचारपूस करून माहिती घेण्यात आली. या विचारपूस मधून काही सक्रिय गुन्हेगारांची नावे उघड झाली असून, त्यांच्यावर पोलिस लक्ष ठेवून आहेत.

गुन्हेगारांच्या याद्या तयार

मागील वर्षीच संशयित गुन्हेगारांच्या याद्या तयार करण्यात आल्या आहेत. त्यामध्ये घरफोडी करणारे आरोपी, जबरी चोरी, वाहन चोरी, देशी कट्टा बाळगणारे, अशा वेगवेगळ्या गुन्ह्यातील संशयितांच्या या याद्यांमधून आज जबरी चोरी करणारे व शस्त्र अधिनियमाखालील रेकॉर्डवरील आरोपी बोलावण्यात आले होते.

यातील संशयितांना चांगल्या वर्तनाची समज देण्यात आली. तसेच आवश्यक त्यांच्यावर चाप्टर केस देखील करण्यात येत आहे. बाजारपेठ पोलिस ठाण्याचे निरीक्षक राहुल गायकवाड, शहर पोलिस ठाण्याचे निरीक्षक पडघण व त्यांच्या अधिपत्याखालील गुन्हे शोध पथकाच्या कर्मचाऱ्यांमार्फत चौकशी करण्यात आली आहे.