Jalgaon Accident News : रेल्वेखाली सापडून मजूर ठार

Jalgaon News : डोकलखेडा (ता. पाचोरा) येथील मजूर पाचोरा येथे धावत्या रेल्वेखाली सापडून ठार झाल्याची घटना नुकतीच घडली. रेल्वे पोलिसांनी अकस्मात मृत्यूची नोंद केली आहे. (laborer died due to coming under railway jalgaon accident news)

निजामुद्दीन- हुबळी एक्स्प्रेसखाली सापडून रेल्वे खांब कि.मी. क्रमांक ३७१ /२५ जवळ एका २५ वर्षीय युवकाचा मृतदेह आढळून आला होता. रुग्णवाहिका चालक बबलू मराठे यांनी मृतदेह ग्रामीण रुग्णालयात आणल्यानंतर रेल्वे पोलिसांनी मृतदेहाच्या वर्णनानुसार संपूर्ण माहिती सोशल मीडियावर व्हायरल केली.

त्या माहितीच्या आधारे हा तरुण वाघुलखेडा (ता. पाचोरा) येथील असल्याचे निष्पन्न झाले. सुनील मन्साराम सोनवणे असे मृत तरुणाचे नाव असून, तो पाचोरा येथे कपडे घेण्यासाठी जातो असे सांगून घरून निघाला होता. परंतु उशिरापर्यंत घरी न परतल्याने त्यांच्या कुटुंबीयांकडून त्यांचा शोध घेतला जात होता.

हेही वाचा : Credit Card फसवणूक....काय घ्याल काळजी?

सोशल मीडियावरील रेल्वे पोलिसांची माहिती पाहून त्यांनी मृतदेह पाहिला व ओळख पटली. मृत सुनील सोनवणे एकुलता एक मुलगा असून, त्यांच्या पश्चात आई, वडील, दोन बहिणी असा परिवार आहे.

घरातील कर्ता तरुण गेल्याने सोनवणे कुटुंबीय कमालीचे खचले आहेत. रेल्वे दूरक्षेत्र पोलिस ठाण्याचे सहायक फौजदार ईश्वर बोरुडे तपास करीत आहेत.