Jalgaon News : भिलवाडात महंत सरजूदास महाराज अटकेत

जळगाव : शहरातील तपस्वी हनुमान मंदिरात अनेकवर्ष वास्तव्य असलेल्या आणि हजारो भाविकांचे आस्था असणारे महंत सरजूदास महाराजांना राजस्थानच्या भिलवाडा पोलिसांनी २८ डिसेंबरला अटक केली.

भिलवाडा येथील घोडास आश्रमात अल्पवयीन बालिकेवर अत्याचार आणि तिच्या आईवर ॲसिड हल्ला केल्याचा सरजूदास यांच्यावर आरोप आहे. आश्रमातून ताब्यात घेतल्यावर काहीतरी वस्तू चावून खाल्ल्याने त्यांना रुग्णालयात दाखल करण्यात आले.

वैद्यकीय तपासणीनंतर त्यांना अटक करण्यात आली. दोन वेळेस गुन्ह्याच्या तपासाधिकारी तथा पोलिस अधीक्षक चंचल मिश्रा यांनी संशयित सरजूदास यांची पोलिस कोठडी मिळविली आहे.(Mahant Sarju Das Maharaj arrested in Bhilwara Jalgaon News)

पथक जळगावात

जळगाव शहरात सुमारे १० ते १५ वर्षांपासून शाहूनगरमधील तपस्वी हनुमान मंदिरात सरजूदास महाराजांचे वास्तव्यास होते. (४४१/२०२२) कलम-३७६ बालकांचे लैगिक अत्याचार अधीनियम-२०१२च्या कलम ३ व ४ अन्वये दाखल गुन्ह्यात संशयित सरजूदास मूर्तीदास साकेतवासी २२ दिवस फरारी राहिल्यानंतर त्यांना अटक करण्यात आली.

पहिल्या वेळेस चार दिवस व नंतर वाढीव पोलिस कोठडी पोलिसांनी मिळविली. तपासात पीडितेच्या अंगावरील कपडे, संशयिताच्या अंगावरील कपडे जप्त करण्यात आले. पुराव्यांचे संकलन पोलिस अधीक्षक चंचल मिश्रा यांच्यातर्फे करण्यात आले.

या गुन्ह्याचा तपास करण्यासाठी आणि संशयिताविरुद्ध इतर गुन्हे दाखल आहेत काय?याची माहिती घेण्यासाठी मिश्रा यांच्या पथकातील उमेश कुमार, प्यारचंद जळगावात आले होते. त्यांनी दुपारी एकला जळगाव शहर पोलिस ठाण्यात आल्याची नोंद करून तपासाला सुरवात केली आहे.

हेही वाचा : द मिसिंग टाइल सिंड्रोम ठेवा आपल्यापासून दूर

जळगावच्या तरुणावर दबाव

अल्पवयीन पीडितेवर अत्याचाराचा गुन्हा आपल्या अंगावर घ्यावा, यासाठी जळगावातील रहिवासी तथा आश्रमाशी जोडला गेलेल्या तरुणावर प्रचंड दबाव आणला जात होता. घडलेली घटना व अत्याचाराला हाच तरुण जबाबदार असल्याचे भासवून त्याचे नाव गुंतवण्यासाठी भिलवाडासह जळगावातील काही मंडळी सक्रिय असल्याने या तरुणाची भिलवाडा (राजस्थान) येथील मंडल पोलिस ठाण्यात सलग तीन दिवस चौकशी करण्यात आली. त्याच्या मोबाईलसह इतर तपासण्या करण्यात येऊन जबाब नोंदवून त्या तरुणाचा सहभाग नसल्याची खात्री झाल्यावर त्याला मुक्त करण्यात आले.

कोण आहेत चंचल मिश्रा?

चंचल मिश्रा राजस्थान केडरच्या आयपीएस अधिकारी असून, त्यांनी आसाराम बापू यांना २०१४ मध्ये अटक केली होती. आसाराम बापूविरुद्ध २०१३ मध्ये जोधपूर (राजस्थान) येथे पोक्सोअंतर्गत गुन्हा दाखल असताना, त्यांची नियुक्ती जोधपूर येथे झाली. त्यांनी तपास हातात घेऊन तो वेळेत पूर्ण करत दोषारोपपत्र जोधपूर जिल्‍हा न्यायालयात दाखल केले. त्याच आधारावर आसाराम बापू यास जन्मठेपेची शिक्षा ठोठावली. याच चंचल मिश्रा यांनी घोडास आश्रम (भिलवाडा,राजस्थान) येथील महंत सरजूदास यांना अटक केली आहे.