अमळनेर : ‘माझ्या काळजाची तार आज कोणी छेडली, कशी नशिबाने थट्टा आज मांडली...’ या चित्रपटातील गीताचा प्रत्यय येथील सोनवणे शिक्षक दांपत्याला आला आहे. नियतीने असा खेळ मांडला, की दैवाने एका हातातून हिरावले अन् त्याच दिवशी दुसऱ्या हाताने भरभरून दिले. सुख-दुःखाच्या अजब फेऱ्यात ते बांधले गेले. पुण्यस्मरण व वाढदिवसाचा योग्य मेळ साधत हा अजब दिवस ते दर वर्षी सामाजिक व शैक्षणिक उपक्रमांनी साजरा करतात.
येथील विजयनाना पाटील आर्मी स्कूलच्या शिक्षिका श्रीमती एस. पी. अहिरे ऊर्फ सुनंदा सोनवणे, तसेच इंदिरा गांधी विद्यामंदिरचे उपक्रमशील शिक्षक डी. ए. सोनवणे हे शिक्षक दांपत्य मंगलमूर्तीनगरमध्ये राहतात. एकीकडे सर्व भारतीय १६ डिसेंबरला विजय दिवस म्हणून साजरा करतात. मात्र, या दिवसाचे त्यांच्या जीवनात एक वेगळेच स्थान आहे. बरोबर १५ वर्षांपूर्वी अर्थात १६ डिसेंबर २००५ ला मोठी मुलगी यामिनी हिचे नवव्या वर्षी अल्प आजाराने निधन झाले. आपल्या जीवनात आनंद देणारी कन्या क्रूर काळाने हिरावून नेल्याने या दांपत्यावर दुःखाचा डोंगर कोसळला. मात्र, दैव एका हाताने हिरावून नेते तर दुसऱ्या हाताने भरभरून देते, याचा सुखद अनुभव या दांपत्याला आला. योगायोगाने एक वर्षानंतर १६ डिसेंबर २००६ याच दिवशी त्यांना ऋचा नावाचे कन्यारत्न प्राप्त झाले. पुनर्जन्मावर विश्वास असो किंवा नसो, मात्र योगायोगाने वर्षानंतर दिवस ही तोच अन् वारही तोच... चेहरा व हास्यही तेच... ‘आमची गोड परी पुन्हा आली’ या गोष्टी ते काही वर्षांपासून अनुभवत आहेत. या दिवशी पुण्यस्मरण करावे की वाढदिवस साजरा करावा, या द्विधा मन:स्थितीत त्यांनी हा दिवस सामाजिक व शैक्षणिक उपक्रमांनी साजरा करण्याचे ठरविले.
या पार्श्वभूमीवर ते गेल्या १४ वर्षांपासून हा आगळवेगळा उपक्रम राबवित आहेत. कोरोनाचा प्रादुर्भाव लक्षात घेता त्यांनी या वर्षी येथील विजयनाना पाटील आर्मी स्कूल व कनिष्ठ महाविद्यालयाच्या नववी ते बारावीच्या विद्यार्थ्यांना मास्क व सॅनिटायझरचे वाटप केले. प्राचार्य पी. एम. कोळी अध्यक्षस्थानी होते. सुभेदार मेजर नागराज पाटील व नायब सुभेदार बी. पी. पाटील यांनी विजय दिवसाचे महत्त्व पटवून दिले.
संपादन- भूषण श्रीखंडे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
