पुलावरून वाहणाऱ्या पाण्यात घातली दुचाकी अन्‌ क्षणात गेले; गिरणेत तिघांना जलसमाधी 

भडगाव (जळगाव) : पिंपळगाव (ता. भडगाव) येथील एक २२ वर्षीय तरुण मित्रासमवेत बुधवारी (ता. २३) दुपारी एकच्या सुमारास गिरणा नदीपात्रात पोहण्यास गेला असता पुराच्या पाण्यात तो वाहून गेला, तर कासोदा येथील दोघे जण गिरड येथील पुलावरून दुचाकीसह वाहून गेल्याची घटना घडली आहे. दोन्ही घटनेत वाहून गेलेल्यांचा रात्री उशिरापर्यंत गिरणा नदीच्या पात्रात शोध सुरू होता. गिरणा नदी दुथडी भरून वाहत असल्यामुळे शोधकार्यात अडचणी येत आहेत. दरम्यान, वाहून गेलेल्या दुचाकीवरील दोघांपैकी तरुणाचा मृतदेह उत्राण हद्दीत सापडला आहे. 

पिंपळगाव (ता. भडगाव) येथील शेतकरी अशोक पाटील यांचा एकुलता मुलगा भूषण अशोक पाटील हा गावातील तीन ते चार मित्रांसमवेत गिरणा नदीत पोहण्यासाठी गेला होता. पिंपळगाव गावाला पाणीपुरवठा करणाऱ्या विहिरीजवळ हे सर्व पोहत होते. दरम्यान, पिंपळगाव येथे गिरणा नदीचे पात्र प्रचंड रूंद आहे. गिरणा धरणातून सोडलेले पाणी व भडगाव परिसरात दोन दिवसांपासून पावसाने लावलेली जोरदार हजेरी यामुळे गिरणा नदी दुथडी भरून वाहत आहे. हे सर्व मित्र नदीच्या पोहण्याचा आनंद लुटत असताना भूषण पाण्यातून बाहेर आलाच नाही. हे सोबत असलेल्या इतरांच्या लक्षात आल्यानंतर भूषणची शोधाशोध सुरू झाली. ग्रामस्थांनी थेट गिरडपर्यंत दोन्ही काठावर, तर पट्टीचे पोहणाऱ्या तरुणानी शोध घेतला. रात्री उशिरापर्यंत शोधमोहीम सुरूच होती. 

दुचाकीसह दोघे वाहून गेले 
कासोदा येथील ख्यॉजाबाबा दर्गा परिसरातील तरुण चादरी विक्रीसाठी पाचोरा येथे गेला होता. मात्र, घराकडे परत येत असताना गिरड गावाजवळ गिरणा नदीवरील पुलावरून जात असताना तो पुरात वाहून गेला. पुलावरून तीन फूट पाणी वाहत असतानाही या दुचाकीस्वाराने पुलावर गाडी टाकल्याचे प्रत्यक्षदर्शींनी सांगितले. वाहून गेल्यानंतर त्याचा मृतदेह उत्राणजवळ दोन किलोमीटर अंतरावर आढळून आला. अयाजोद्दिन शफियोद्दिन (वय ३२, रा. कासोदा) असे मृत तरुणाचे नाव आहे. त्याच्यासोबत दुचाकीवर असलेले शेख कपूर शेख गुलाब (वर ५५) हे देखील वाहून गेले. त्यांचा रात्री उशिरापर्यंत शोध लागला नव्हता. दुचाकी पुलावरून वाहून गेल्याची घटना गावकऱ्यांनी प्रत्यक्ष बघितली. पण पुरामुळे त्यांना वाचवू शकले नाहीत. अयाजोद्दिनचा चुलत भाऊ निजामुद्दिन आजीमुद्दिन यांनी या तरुणाची ओळख पटविली असून, पोलिस पाटील प्रदीप तिवारी यांच्या उपस्थितीत कासोदा पोलिस ठाण्याचे सहाय्यक पोलिस निरीक्षक रवींद्र जाधव यांच्या मार्गदर्शनाखाली सहाय्यक फौजदार भास्कर बडगुजर तपास करीत आहेत. 

‘सकाळ’ने दिला होता धोक्याचा इशारा 
गिरड गावाजवळील ओझर येथील गिरणा नदीवरील पुलाचे कठडे चार दिवसांपूर्वीच गिरणेच्या पुरात वाहून गेले होते. त्यामुळे हा पूल सताड उघडा पडला होता. दोन दिवसांपूर्वीच ‘सकाळ’ने या पुलाचे कठडे वाहून गेल्याचे सचित्र वृत्त मंगळवारी (ता. २२) प्रसिद्ध केले होते. पुलाच्या या स्थितीमुळे पावसाळ्यात वाहनधारकांच्या जिवावर बेतण्याची शक्यता असल्याचा इशाराही या वृत्तात देण्यात आला होता. त्यावर प्रशासनाने आज तातडीने तात्पुरती का असेना प्रतिबंधात्मक उपाययोजना झाली असती, तर आज दुचाकी वाहून जाण्याची घटना घडली नसती.