पिस्तूल, चाकूच्या धाकावर रोमिओचा मुलीच्या घरासमोर धिंगाणा

भुसावळ : शहरातील खडका रोड भागातील तरुणीशी जबरजस्तीने लग्न (married) लावून देण्यासाठी मुलीच्या घरासमोर पिस्तूल आणि चाकूच्या धाकावर दहशत घालण्याचा प्रकार रविवारी रात्री साडेअकराच्या सुमारास घडला. याबाबत दोघांविरुद्ध बाजारपेठ पोलिस ठाण्यात (Police) गुन्हा दाखल करण्यात आला आहे.

शहरातील खडका रोड भागातील पटेल कॉलनीतील आरिफ भाईसाहब पटेल (वय ४९) यांनी फिर्याद दाखल केली आहे. त्यानुसार आरोपी आशिक असलम बेग उर्फ बाबा काल्या (रा. अयान कॉलनी) व त्याचा साथीदार (नाव माहित नाही) यांनी १९ रोजी रात्री साडे अकराच्या सुमारास पटेल कॉलनीत पटेल यांच्या घरासमोर त्यांच्या मुलीसोबत लग्न करण्याच्या हेतूने दहशत निर्माण करण्याचा प्रयत्न केला. या वेळी बाबा काल्यासोबत असलेल्या त्याच्या साथीदाराने घरातील लोखंडी दरवाजावर फर्शीचे तुकडे फेकून दरवाजाचा कडी-कोयंडा तोडला तर बाबा काल्याने हातात पिस्तूल घेऊन तर त्याच्या साथीदाराने हातात चाकू घेऊन आरडाओरड करून दहशत निर्माण केली.

याबाबत घटनेची माहिती मिळताच उपविभागीय पोलिस अधिकारी सोमनाथ वाकचौरे, बाजारपेठचे पोलिस निरीक्षक दिलीप भागवत यांनी घटनास्थळी जाऊन माहिती घेतली. तसेच मुलीच्या वडिलांना धीर दिला. बाजारपेठ पोलिस ठाण्यात गुन्हा दाखल करण्यात आला आहे. सहाय्यक पोलिस निरीक्षक मंगेश गोंटला हे तपास करीत आहे.