अनेर धरणात पहिलीच निच्चांकी नोंद; अवघा ४० टक्के पाणीसाठा

गणपूर (ता. चोपडा) : जळगाव व धुळे जिल्ह्याच्या सीमेवर सातपुडा (Satpuda) पर्वताच्या पायथ्याशी बांधण्यात आलेल्या अनेर धरणात (Aner Dam)अजूनही पावसाळा अर्ध्यावर उलटूनही अवघा ४० टक्के पाणीसाठा आहे. धरण बांधल्यापासून ऑगस्ट महिना संपत असतानाही उद्भवणारी ही पहिलीच वेळ आहे. गणपूरपासून चार किलोमीटर अंतरावर असलेल्या अनेर धरणाचे (अनेर मध्यम प्रकल्प) सर्व दहा दरवाजे १५ ऑगस्टपर्यंत उघडे असतात. तोपर्यंत आलेले सर्व पाणी पूर म्हणून वाहून जाते आणि १५ ऑगस्टला दरवाजे बंद केल्यावर नंतरच्या पावसाळ्यात हे धरण भरते.

पण यावर्षी सातपुडा पर्वत राजीत पाऊसच न झाल्याने नदीला पूरच आला नाही. त्यामुळे धरण रितेच राहिले आहे. धरण परिसरात वरील बाजूस सातपुडा पहाड असल्याने पहाडात झालेल्या पावसामुळे हे धरण सहज भरते. असे आजपर्यंतचे अनुभव आहेत. मात्र, यावर्षी असलेल्या लहरी पावसाळ्यामुळे ते भरू शकले नाही. धरण परिसरात कालचा १५ मिलिमीटर पाऊस लक्षात घेता एकूण १६० मिलिमीटर पाऊस आतापर्यंत झाला असून २१६.४० मीटर क्षमता असलेल्या धरण पात्रात अवघा २११.१० मीटर पाणीसाठा आहे. धरण पात्रातून सध्या विसर्ग नसून जिवंत पाणीसाठा ४० टक्के आहे. धरणाचे काम १९७४ ते १९७८ च्या दरम्यान होऊन आजपर्यंतचा इतिहास पाहता या धरणाचे दरवाजे १५ ऑगस्टपर्यंत उघडे राहूनही ते बंद करताच अवघ्या आठवड्यात भरणारे धरण खाली राहिल्याने शासनासह शेतकरी वर्गातही चिंता वाढली आहे.

धरण पात्रात सध्या २११.१० मीटर इतका पाणीसाठा असून दरवाजे बंद आहेत. आगामी काळात पाऊस झाल्यावर धरण भरण्यास मदत होईल.
- बी. के. राजपूत, शाखा अभियंता, अनेर पाटशाखा, हिसाळे (जि. धुळे)