धक्‍कादायक...‘निगेटिव्ह’ सांगत दिला डिस्चार्ज; महिला घरी पोहचली आणि 

जळगाव : कोरोनाची लक्षणे असलेल्या महिलेचा अहवाल ‘निगेटिव्ह’ असल्याचे सांगत शासकीय रुग्णालयातून तिला घरी पाठविण्यात आले आणि दुसऱ्याच दिवशी सकाळी महिलेचा मृत्यू झाल्याने खळबळ उडाली. विशेष म्हणजे, या महिलेचा खासगी रुग्णालयात केलेल्या चाचणीचा अहवाल ‘पॉझिटिव्ह’ असतानाही तिच्याबाबत हा प्रकार घडला. 

नक्‍की वाचा- दोन्ही रूग्‍णालय मनपाचेच अहवाल मात्र वेगळे; म्‍हणून तो झाला बिनधास्‍त अन्‌ घडला हा प्रकार

या प्रकारामुळे शासकीय आरोग्य यंत्रणेतील भोंगळ कारभाराचा आणखी एक नमुना समोर आला आहे. कुसुंबा (ता. जळगाव) येथील महिलेस कोरोनाची लक्षणे जाणवू लागल्यानंतर तिला रुग्णालयात दाखल केले. प्रकृती सुधारत नसल्याने तिला जळगावातील खासगी हॉस्पिटलमध्ये दाखल केले. तेथे या महिलेची ॲन्टीजेन चाचणी केल्यानंतर ती कोरोनाबाधित असल्याचे लक्षात आले. त्यामुळे महिलेस शासकीय वैद्यकीय महाविद्यालयातील कोविड रुग्णालयात ११ सप्टेंबरला दाखल करण्यात आले. 

‘निगेटिव्ह’ सांगून पाठविले घरी 
या ठिकाणी वैद्यकीय अधिकाऱ्याने महिलेची तपासणी करून ती ‘निगेटिव्ह’ असल्याचे सांगत तिला घरी पाठविले. या महिलेस केवळ घशाचा त्रास असून ग्लुकोजचे पाणी द्या, बरे वाटेल, असेही सांगण्यात आले. या महिलेस आज श्‍वास घेण्यास त्रास होऊ लागल्यानंतर तिला कोविड रुग्णालयात दाखल केले असता, संबंधितांनी तिला ‘पॉझिटिव्ह’ असल्याचे सांगितले आणि नंतर उपचार सुरू असताना तिचा मृत्यू झाला. त्यामुळे महिलेच्या नातलगांचा संताप होऊन त्यांनी रुग्णालय प्रशासनावर आरोप केले. या प्रकरणी संबंधित वैद्यकीय अधिकारी, कर्मचाऱ्यांची चौकशी करून कारवाई करावी, अशी मागणी महिलेचा मुलगा माधव खरोटे यांनी केली आहे. 
 
बेड नसल्याने पाठविले परत? 
आज पुन्हा या महिलेस दाखल केले असता, तिला ‘पॉझिटिव्ह’ असल्याचे सांगण्यात आले. मात्र, परवा का घरी पाठविले, असे विचारले असता संबंधितांनी बेड नसल्यामुळे परत पाठविल्याचे सांगण्यात आले, असेही या महिलेच्या मुलाने बोलताना सांगितले.