जिल्हा बँक निवडणूक: भाजप स्वतंत्र लढणार- गिरीश महाजन

जळगाव : जळगाव जिल्हा बँक संचालकपदाच्या निवडणुकीत (Jalgaon District Bank Election) सर्वपक्षीय पॅनल निश्‍चित करण्यात आले होते. मात्र, काँग्रेस पक्षाने भाजपसोबत (BJP) जाण्यास नकार दिला होता. त्यानंतर आता राष्ट्रवादी काँग्रेसनेही (Nationalist Congress Party) भाजपसोबत पॅनल करण्यास नकार दिला आहे. त्यामुळे भाजप ही निवडणूक स्वतंत्रपणे लढणार असून, सर्व २१ जागांवर आज भाजप उमेदवारी अर्ज दाखल करणार आहे. भाजप नेते गिरीश महाजन (MLA Girish Mahajan)यांनी पत्रकार परिषदेत ही माहिती दिली.

श्री. महाजन म्हणाले, जिल्हा बँक निवडणूक लढविण्यासाठी भारतीय जनता पक्षाच्या पदाधिकाऱ्यांची रविवारी बैठक झाली. यात सर्व २१ जागांवर भाजपचे उमेदवार देण्याचा निर्णय घेण्यात आला. अर्ज माघारी घेण्याच्या अंतिम दिवसापर्यंत आघाडी न झाल्यास भाजप स्वतंत्र निवडणूक लढविणार असल्याचेही त्यांनी स्पष्ट केले.

राष्ट्रवादीची भूमिका संशयास्पद
राष्ट्रवादी काँगेस पक्षाच्या भूमिकेवर त्यांनी टीका केली. ते म्हणाले, काँग्रेस पक्षाने सर्वपक्षीय पॅनलमधून बाहेर पडण्याची भूमिका घेतली होती. आता राष्ट्रवादी काँग्रेसच्या नेत्यांनीही आम्हाला, वरिष्ठांनी भाजपसोबत न जाण्याचे सांगितले, असे सांगत सर्वपक्षीय पॅनलमधून बाहेर पडण्याची भूमिका घेतली आहे. वास्तविक दोन- तीन बैठका झाल्यानंतर दोन्ही पक्षांनी ही भूमिका घेतली. सहकारात पक्ष नको म्हणून आम्ही सर्वपक्षीय पॅनलची भूमिका घेतली होती. परंतु, अजूनही माघारीपर्यंत आम्ही आघाडीवर ठाम आहोत. मात्र, काहीच निर्णय न झाल्यास आम्ही सर्व २१ जागांवर उमदेवार उभे करणार आहोत. खासदार रक्षा खडसे, उन्मेष पाटील, आमदार सुरेश भोळे, मंगेश चव्हाण, माजी आमदार स्मिता वाघ या वेळी उपस्थित होते.