पावसाच्या हुलकावणीने तिबार पेरणीचे संकट

कळमसरे (ता. अमळनर) : तालुक्यातील मारवड मंडलात पावसाचे (Rain) अत्यल्प प्रमाण असल्याने सद्य:स्थितीत दुष्काळसदृश परिस्थिती असून, तिबार पेरणीचे (Sownig) संकट उभे ठाकले आहे. त्यामुळे शासनाने तत्काळ दुष्काळ जाहीर करून पीकविमा (Crop insurance) व दुष्काळी मदत द्यावी, अशी मागणी शेतकऱ्यांनी केली आहे. यासंदर्भात मारवड मंडलातील शेतकऱ्यांनी प्रांताधिकारी सीमा अहिरे, तालुका कृषी अधिकारी भरत वारे यांना निवेदन दिले.

(jalgaon farmers third time sowing crisis no rain)

या वर्षी हवामान खात्याने पावसाचा चुकीचा अंदाज व्यक्त केल्याने शेतकऱ्यांची फसवणूक झाली आहे. जूनच्या पहिल्या आठवड्यात पावसाचे आगमन असा अंदाज व्यक्त केल्याने शेतकऱ्यांनी खरीप हंगामाची पूर्ण तयारी करून अगदी रिमझिम पावसात पेरण्या केल्या. मात्र, मारवड मंडलासह तालुक्यातील पश्चिम व उत्तरेला तिबार पेरणीचे संकट शेतकऱ्यांसमोर उभे राहिले आहे. एक जून ते २७ जुलैपर्यंत फक्त ४५ मिलिमीटर पाऊस झाला असून, तोही रिमझिम झाल्याने हजारो रुपयांचे बियाणे टाकूनही पावसाच्या हुलकावणीने पुन्हा पेरणी करावी लागली. मात्र, त्यानंतरही पाऊस न झाल्याने पुन्हा तिबार पेरणीचे संकट ओढावले आहे. पेरणीनंतर उगवण झालेल्या पिकांना पाऊस नसल्याने त्यांची वाढ खुंटली आहे. काही शेतकऱ्यांची पुन्हा पेरणी वाया गेल्याने शेती काळीशार नजरेस पडत आहे. दरम्यान, निवेदन देताना शेतकरी दिलीप पाटील, जिजाबराव पाटील, जयवंत पाटील, ज्ञानेश्वर पवार, बापू महाले, साहेबराव पाटील, पांडुरंग पाटील, जगन्नाथ पाटील, अनिल पाटील, शांताराम चौधरी, किशोर पाटील, गोकुळ पाटील, श्यामकांत शिंदे आदी उपस्थित होते.

शेतकऱ्यांना दुष्काळी मदत द्या
जून, जुलै दोन महिने होऊनही पावसाने हुलकावणी दिल्याने शेतकऱ्यांना तत्काळ पीकविमा व दुष्काळी मदत जाहीर करावी, यासाठी निवेदन देण्यात आले. निवेदनात म्हटले आहे, की मारवड मंडलात संबंधित अधिकाऱ्यांनी पिकांची पाहणी करावी. शासनाचा निकषाप्रमाणे तत्काळ पीकविम्याबाबत कार्यवाही करून शेतकऱ्यांना पीकविमा द्यावा, तसेच दुष्काळी अनुदान द्यावे.