गावातील पाणी टंचाई दुर करण्यासाठी अनधिकृत नळ कनेक्शनवर कारवाई 

जामठी  (ता. बोदवड) : जामठी येथे गावाला ओडीए योजनेतंर्गत आठ ते दहा दिवसांआड पाणी पुरवठा होतो मात्र ऐन उन्हाळ्याचे दिवस असल्याने ग्रामस्थांना पाणीटंचाई भासू नये म्हणून ग्रामपंचायत प्रशासन कसोशीने प्रयत्न करीत आहे. याव्यतिरिक्त टिपीडब्लुएस योजनेअंतर्गत 2006 साली गावातीलच हरीभाऊ सोळंखे यांच्या शेतात एका बोअरवेलची निर्मिती केली आहे मात्र तिच्यावर निम्म्या गावाचीच तहान भागत होती. मात्र नवनियुक्त सरपंच पदाधिकाऱ्यांनी बोअरवेलला सुमारे साडे पाचशे फुट खोल करून जलसाठा वाढविला आहे.याच बोअरवेलचे पाणी गावात टप्प्या टप्प्याने सोडून ग्रामस्थांची तहान भागवण्याचा प्रयत्न ग्रामपंचायत करीत असली तरी याला काही नागरिक अनधिकृत नळकनेक्शन घेउन अपवाद ठरत आहे.

आवश्य वाचा- बालकांना कोरोना होत नाही म्हणून गाफिल नको..जळगावात दोन वर्षीय बालकाचा मृत्‍यू
 

जामठीतील प्रभाग क्रं तीन मध्ये अनधिकृत नळ कनेक्शनला भरपुर पाणी मिळत असुन अधिकृत नळ कनेक्शन ला पाणी पुरवठा होत नसल्याने नागरिकांनी ग्रामपंचायत पदाधिकाऱ्यां समोर विषय मांडला त्यावर सरपंच रेखाताई पाटील व सदस्यांनी तात्काळ दखल घेत अनधिकृत नळकनेक्शन धारकांचे पितळ उघडे पाडले. कर्मचाऱ्यांनी अवैध नळकनेक्शन पाहण्यासाठी खोदकाम केले असता एका पाईपलाईन वर एका व्यक्ती ने तीन ते चार अवैध कनेक्शन दिसताच ग्रामपंचायत प्रशासन ही अवाक झाले.असे गावात अनेक अवैध नळकनेक्शन असून ते ग्रामपंचायतीचा लाखोंचा कर बुडवित असुन त्यांच्यावर कारवाई होणार आहे.त्यामुळे अवैध नळकनेक्शन धारकांचे धाबे दणाणले आहे.यावेळी ग्रामपंचायत सरपंच रेखाताई पाटील,उपसरपंच शेख मुनाफ शेख न्याजमहमद,राजेंद्र जैस्वाल,अमोल गायकवाड, अशोक माळकर,मीराबाई बोरसे,ग्रामपंचायत कर्मचारी भागवत पाटील ,पवन कोलते,विशाल ठाकुर आदी उपस्थित होते.

अवैध नळकनेक्शन धारकांवर कारवाई अटळ
जामठी गावात दिवसेंदिवस पाण्याची समस्या गंभीर बनत असून ग्रामपंचायत प्रशासन पाणीटंचाई दुर करण्यासाठी प्रयत्न करीत असले तरी त्याला काही नागरिक अपवाद ठरीत आहे.काहींनी आपल्या स्वत:च हातांनी अवैध नळकनेक्शन घेतले असुन ग्रामपंचायतीने अवैध नळकनेक्शन धारकांची शोधमोहीम सुरू केली असुन कारवाईचा एल्गार पुकारला आहे.

संपादन- भूषण श्रीखंडे