Dasara Melava : दसरा मेळाव्यापूर्वी नाशिकमध्ये मधुशाला

जळगाव : जळगाव शहरासह जिल्ह्यातून आलेल्या हजारावर कार्यकर्त्यांची नाशिक रोडवरील मित्रा या शासकीय प्रशिक्षण संस्थेत तात्पुरत्या निवासाची (विसाव्याची) व्यवस्था करण्यात आली होती. मुंबईच्या मेळाव्याला निघताना कार्यकर्त्यांनी रात्रभर या ठिकाणी दारूच्या बाटल्या रिचविल्या.

बुधवारी (ता. ५) सकाळी या संस्थेच्या आवारात दारूच्या रिकाम्या बाटल्यांचा खच पडलेला सापडला. यानिमित्ताने कार्यकर्त्यांची नाशिकमध्ये ओली पार्टी केल्याचे सचित्र फोटो व्हायरल झाल्यावर एकच चर्चा रंगली होती.

जळगाव जिल्ह्यातील ८२ क्रूझर, खासगी बसने कार्यकर्ते मंगळवारी रात्री साडेआठच्या सुमारास मित्रा संस्थेच्या विश्रामगृहात पोचले. शासकीय अधिकारी, कर्मचारी यांना या संस्थेत प्रशिक्षण देण्यात येते. वातानुकूलित विश्रामगृहात शिंदे गटाच्या कार्यकर्त्यांच्या निवासाची व्यवस्था करण्यात आली. शेवभाजीसह चार भाज्या, गुलाबजाम असा जेवणाचा बेत होता; परंतु विश्रामगृहात रात्री कार्यकर्त्यांची मधुशालाच रंगली.

वाइन शॉपशेजारीच मुक्काम
मुक्कामाच्या ठिकाणी शेजारीच वाइन शॉप होते. त्यामुळे कार्यकर्ते दिवस उजाडेपर्यंत या ठिकाणी दारू रिचवत असल्याने सकाळी विश्रामगृह आवारात रिकाम्या दारूच्या व पाण्याच्या बाटल्यांचा खच पडलेला होता.