Jalgaon Municipality News: महापालिकेत नवीन वर्षात कर्मचाऱ्यांची पदोन्नती; 1997 नंतर प्रथमच मिळणार नवीन पद

Jalgaon Municipality News : जळगाव महापालिकेत सेवाज्येष्ठता यादी तयार करण्यात आली आहे. जानेवारी महिन्यात कर्मचाऱ्यांना पदोन्नती देण्यात येणार आहे. १९९७ नंतर प्रथमच तब्बल वीस वर्षांनंतर ही पदोन्नती देण्यात येणार आहे. (Promotion of employees in municipal corporation in new year jalgaon news)

जळगाव पालिका असताना १९९७ मध्ये कर्मचाऱ्यांना पदोन्नती देण्यात आली होती. त्यानंतर पदोन्नतीस पात्र असूनही पालिका प्रशासन व महापालिका झाल्यानंतरही तत्कालीन आयुक्तांनी पदोन्नती दिलीच नाही. अनेक कर्मचाऱ्यांकडे वरिष्ठ पदाचा कारभार सुरू होता, मात्र त्यांना वेतनश्रेणी लागू नव्हती.

२०११ मध्ये सेवाज्येष्ठता यादी तयार करण्यात आली होती; परंतु त्यावर हरकती व सुनावणी घेण्यात आली नाही. त्यानंतर आयुक्त डॉ. विद्या गायकवाड व सामान्य प्रशासन विभागाचे उपायुक्त अविनाश गांगोडे यांनी याकडे लक्ष देत प्रशासकीय कार्यवाही वेगाने सुरू केली.

पदोन्नती देण्यापूर्वी सर्व अधिकारी व कर्मचारी यांची सेवाज्येष्ठता यादी तयार करण्यात आली आहे. सोबतच त्याचा आकृतिबंध तयार करून त्यास मंजुरीही घेण्यात आली आहे. सेवा प्रवेश नियमावली तयार करून त्यास शासनाने मंजुरीही दिली आहे.

सेवाज्येष्ठता यादी तयार करताना २०२१-२२ नुसार सेवाज्येष्ठता यादी तयार केली आहे. त्यावर हरकती व सुनावणी २२ डिसेंबरला करण्यात येणार आहे. त्यानंतर सेवाज्येष्ठता यादी अंतिम करून त्यास मंजुरी घेण्यात येईल.

नवीन वर्षाची मिळणार भेट

जानेवारी २०२४ मध्ये सेवाज्येष्ठतेनुसार पदोन्नती देण्यात येणार आहे. तब्बल २६ वर्षांनंतर महापालिका कर्मचारी व अधिकाऱ्यांना नववर्षाची भेट ठरणार आहे.