Sakal Impact : सीएमव्हीग्रस्त केळी बागांच्या पंचनाम्यांचे तातडीने आदेश द्या; रक्षा खडसेंची मागणी

Sakal Impact : तालुक्यासह जिल्ह्यातील केळीवर आलेल्या सीएमव्ही (कुकुंबर मोझॅक व्हायरस) रोगाने झालेल्या नुकसानीचे तातडीने पंचनामे करण्याचे आदेश द्यावेत, अशी मागणी खासदार रक्षा खडसे व भाजपचे जिल्हाध्यक्ष अमोल जावळे यांनी जिल्हाधिकाऱ्यांकडे केली आहे.

दरम्यान, शुक्रवारी (ता. १५) सायंकाळी उशिरा किंवा उद्या (ता. १६) पंचनाम्याचे आदेश निघतील, अशी माहिती खासदार रक्षा खडसे यांनी ‘सकाळ’शी बोलताना दिली. (Raksha Khadse Demand CMV infected banana orchards Order panchnama immediately jalgaon news)

जळगाव जिल्ह्यातील विशेषतः रावेर तालुक्यातील मे, जून, जुलै आणि ऑगस्ट महिन्यात लावलेल्या केळीच्या रोपांवर सीएमव्ही या विषाणूजन्य रोगाचे आक्रमण झाले आहे. ही रोगग्रस्त खोडे उपटून फेकून दिल्याशिवाय शेतकऱ्यांसमोर कोणताही पर्याय नाही. या केळीसाठी शेतकऱ्यांनी आतापर्यंत प्रती खोड ५० रुपयांपेक्षा जास्त खर्च केला आहे.

तालुक्यातील केऱ्हाळे आणि अहिरवाडी पट्ट्यात या रोगाचा खूपच मोठ्या प्रमाणात प्रसार झाला असून, शेतकरी हवालदिल झाले आहेत. 'सकाळ'ने गेल्या दोन दिवसांपासून याबाबतचे सविस्तर वृत्त छायाचित्रासह प्रसिद्ध केले आहे.

हेही वाचा : Credit Card फसवणूक....काय घ्याल काळजी?

आज (ता. १५) भारतीय जनता पक्षाचे शेतकरी आघाडीचे नाशिक विभागप्रमुख सुरेश धनके यांनी खासदार रक्षा खडसे यांच्या निदर्शनास ही बाब आणून दिली. खासदार खडसे आज रावेर तालुका दौऱ्यावर होत्या.

त्यावेळी त्यांनी जिल्हाधिकारी आयुष प्रसाद यांच्याशी संपर्क साधला व नुकसान झालेल्या केळीचे तातडीने पंचनामे करण्याची मागणी केली. यावर जिल्हाधिकाऱ्यांनी अनुकूलता दर्शविली आहे. आज सायंकाळीच किंवा उद्या पंचनाम्याचे आदेश निघतील, असे खासदार खडसे यांनी ‘सकाळ’शी भ्रमणध्वनीवर बोलताना सांगितले.