जळगाव जिल्ह्यात रेड अलर्ट : आगामी 2 दिवसात वादळासह मुसळधार पाऊस

जळगाव : जिल्ह्यात आगामी दोन-तीन दिवसात वादळ, विजांचा कडकडाटासह पाऊस होणार असल्याने आपत्ती व्यवस्थापन यंत्रणेने सज्ज राहावे, असे आदेश जिल्हा आपत्ती व्यवस्थापन प्राधिकरणाचे अध्यक्ष, जिल्हाधिकारी अभिजित राऊत यांनी काढले आहेत.

कार्यालय प्रमुखांनी मुख्यालयातच थांबावे. वीज कंपनी, पाटबंधारे विभाग, आपत्ती बचाव पथकाने सज्ज राहण्याचा इशारा देण्यात आला आहे. विदर्भ, कोकणात मेघ गर्जनेसह पावसाने हजेरी लावली आहे. मध्य महाराष्ट्रातील जळगाव जिल्ह्यातही केळी पट्ट्यात वादळ झाले. यामुळे केळी पिकांचे मोठे नुकसान झाले आहे. काल रात्री बहुतांश ठिकाणी पावसाने हजेरी लावली. विजांचा लपंडावही सुरू होता. विदर्भाला जळगाव जिल्हा लागून आहे. यामुळे तेथे पाऊस झाली की, जळगाव जिल्ह्यातही पाऊस होतो, असा जाणकारांचा अंदाज आहे. कोकणात पाऊस आल्यानंतर मुंबईनंतर खानदेशात पाऊस होतो.