Jalgaon News : 2 लाख दिव्यातून साकारणार राम मंदिर

Jalgaon News : खासदार उन्मेष पाटील यांच्या संकल्पनेतून आयोजित केलेल्या पंडित प्रदीप मिश्रा यांच्या कथा सोहळ्याची जय्यत तयारी सुरु आहे.

मालेगाव रस्त्यावरील सुमारे ४० एकरात प्रभू श्रीराम व मंदिराचे दोन लाख दिव्यांमधून ‘मोजेक पेंटींग’ची प्रतिकृती साकारली जाणार आहे. ही चित्रकृती जागतिक रेकॉर्ड करणार असल्याची माहिती खासदार उन्मेष पाटील यांनी दिली. (replica of mosaic painting of Lord Shriram and ram temple will be made from 2 lakh lamps jalgaon news)

कार्यक्रमस्थळी आज पाहणीप्रसंगी खासदार पाटील, संपदा पाटील यांच्या हस्ते या पवित्र दिवे पेंटिंग कामाचा शुभारंभ करण्यात आला.

यावेळी विधानसभा निवडणूक प्रमुख नगरसेवक घृष्णेश्वर पाटील, नगरसेवक प्रकाश पवार, उद्योजक पद्माकर पाटील, नरेंद्र जैन, कलाकार चेतन राऊत, वास्तूविशारद आशुतोष खैरनार यांच्यासह पदाधिकारी, स्वयंसेवक व कार्यकर्ते उपस्थित होते.

खासदार पाटील यांनी सांगितले, की २२ जानेवारीला श्रीराम मंदिराच्या प्राणप्रतिष्ठा सोहळ्यानिमित्ताने चाळीसगावकर व परिसरातील भाविक भक्तांना या प्रभू श्रीराम व मंदिर प्रतिकृतीचे दर्शन व्हावे, या उद्देशाने दोन लाख दिव्यांच्या माध्यमातून राम मंदिर व श्रीरामाची कलाकृती सादर केली जाईल.

आजपर्यंत देशात एक लाख ८० हजार दिव्यातून अशी प्रतिकृती साकारल्याचे ‘वर्ल्ड रेकॉर्ड’ होते. चाळीसगाव येथील कलाकृतीतून दोन लाख दिव्यांचे सुमारे १०० बाय ८० फूट रुंदीची नवीन चित्रकृती सादर करण्यात येणार असून ही कलाकृती जागतिक विक्रम प्रस्थापित करणार आहे.

त्यासाठी ‘वर्ल्ड रेकॉर्ड’ व्यवस्थापन समितीला आमंत्रित करण्यात आले आहे. मुंबईचे कलाकार चेतन राऊत व त्यांचे दहा सहकारी तसेच ४० महिला या दिव्यांच्या रंगकाम मोजणी व मांडणीसाठी मदत करत असल्याचे खासदार पाटील यांनी सांगितले.

आज ध्वजारोहण

प्रभू श्रीराम महाशिवपुराण कथेच्या कार्यक्रम स्थळावर ध्वजारोहणाचा कार्यक्रम शुक्रवारी (ता. १२) दुपारी एक वाजता होईल.

तालुका व परिसरातील साधू, संत, महंत, पुरोहित व ज्येष्ठ नागरिकांच्या उपस्थितीत ध्वजपूजन केले जाणार असून यावेळी परमपूज्य महामंडलेश्वर १००८ ज्ञानेश्वर माऊली बेलदारवाडीकर, खासदार पाटील, आमदार मंगेश चव्हाण, जिल्हाधिकारी आयुष प्रसाद, ऋषिपांथा येथील धनंजय महाराज, वडगाव लांबे वटेश्वर आश्रमाचे रविदासजी महाराज.

भाजपचे जिल्हाध्यक्ष ज्ञानेश्वर जळकेकर महाराज, पोलिस उपविभागीय अधिकारी अभयसिंह देशमुख, प्रांताधिकारी प्रमोद हिले, तहसीलदार प्रशांत पाटील, पोलिस निरीक्षक संदीप पाटील, मुख्याधिकारी प्रशांत ठोंबरे, योगाचार्य वसंतराव चंद्रात्रे यांच्यासह पदाधिकारी उपस्थित राहणार आहेत.