Jalgaon Crime News : रस्तालूट करणारी टोळी पोलिसांच्या ताब्यात

अमळनेर (जि. जळगाव) : अमळनेर - चोपडा रस्त्यावर झालेल्या रस्त्यालूट करणाऱ्या तीन जणांना अमळनेर पोलिसांनी ताब्यात घेतले असून, तीन जणांचा शोध पोलिस घेत आहेत. (Road looting gang in police custody Jalgaon Crime News)

अमळनेर - चोपडा रस्त्यावरील नवीन रेल्वे पुलाजवळ ५ नोव्हेंबरला सहा जणांनी रस्त्यावर लोखंडी रॉड व मोठमोठे दगड रस्त्यावर टाकून एका टँकरचालकाला मारहाण करून लूट केली होती. याबाबत अमळनेर पोलिसात गुन्हा दाखल करण्यात आला होता. अशाच प्रकारचे गुन्हे आधी घडले होते. मात्र याबाबत कोणीही तक्रार दाखल केलेली नव्हती. तर लुटमार करणाऱ्या टोळीविरुद्ध कोणताही पुरावा उपलब्ध होत नव्हता.

पथकातील पोलिस उपनिरीक्षक राकेशसिंग परदेशी, पोलिस कर्मचारी मिलिंद भामरे, सूर्यकांत साळुंखे, राहुल पाटील, राजेंद्र देशमाने आदींनी असे गुन्हे करणाऱ्या गुन्हेगारांची कार्यपद्धती तपासली. याबाबत एकाची विचारपूस केली असता त्याने पथकाला उडवाउडवीची उत्तरे दिली होती. पोलिस निरीक्षक जयपाल हिरे यांनी त्यास विश्वासात घेऊन विचारणा केली असता त्याने गुन्ह्याची कबुली दिली. त्याने दिलेल्या माहितीनुसार अजून दोन जणांना पोलिसांनी ताब्यात घेतले असून, गुन्ह्यात सहभागी असणाऱ्या तीन जणांचा शोध सुरू असल्याने ताब्यात घेतलेल्या आरोपीची नावे पोलिस पथकाने जाहीर केले नाहीत.