मातृभूमीच्या सेवेसोबत पितृभक्ती! वडिलांचे व्हिडिओ कॉलद्वारे घेतले अंत्यदर्शन

पहूर : जम्मूमधील उधमपूर येथे सैन्य दलाचे प्रशिक्षण घेणाऱ्या मुलाने कर्करोगामुळे मृत्यू झालेल्या वडिलांचे व्हिडिओ कॉलद्वारे अंत्यदर्शन (funeral via video call)घेत साश्रूनयनांनी श्रद्धांजली वाहिली. मातृभूमीच्या सेवेसोबतच पितृभक्ती जपणाऱ्या या तरुणाच्या पितृवियोगाने उपस्थितांची मने हेलावली.

पहूर येथील लेलेनगरातील सुकलाल चिंतामण भोई (वय ५६) यांना कर्करोग झाल्याने त्यांना मुंबई येथे टाटा हॉस्पिटलमध्ये उपचारासाठी दाखल करण्यात आले. उपचार सुरू असतानाच गुरुवारी (ता. २०) सायंकाळी पाचच्या सुमारास त्यांचे निधन झाले.गरिबीत जीवन जगत मासेमारीचा पारंपरिक व्यवसाय सांभाळून त्यांनी मुलांचे शिक्षण पूर्ण केले. मोठा मुलगा फकीरा नवी मुंबई येथे पोलिस दलात कार्यरत आहे, तर शरद भारतीय सैन्यात सीमा सुरक्षा दलात प्रशिक्षण घेत आहे.

गेल्या वर्षी मार्चमध्ये तो सैन्यात भरती झाला. सप्टेंबरमध्ये तो आई- वडिलांना भेटून गेला होता. दरम्यान, वडिलांचे उपचारादरम्यान कर्करोगामुळे मुंबईत निधन झाल्याचे समजताच शरदला अंत्यसंस्कारासाठी गावी येता येणे शक्य नसल्याने त्याने व्हिडिओकॉलद्वारेच वडिलांचे अंत्यदर्शन घेऊन साश्रूनयनांनी श्रद्धांजली वाहिली. मातृभूमीच्या सेवेसोबतच पितृभक्ती जपणाऱ्या या तरुणाच्या सहवेदना पाहून उपस्थितांनाही गहिवरून आले.