शौचालय घोटाळा : आणखी 6 जणांना अटक

रावेर (जि. जळगाव) : येथील पंचायत समितीतील शौचालय घोटाळा प्रकरणी बुधवारी (ता. २७) सहा जणांना पोलिसांनी अटक केली. दरम्यान, न्यायालयाने त्यांची पाच दिवसांच्या पोलिस कोठडीत रवानगी केली. (Latest Marathi News)

अशोक हरी पाटील (शिंदखेडे), प्रदीप वेडू धनगर (बलवाडी), गोपाल वेडू गुरव (बलवाडी), जितेंद्र मंगळू आडगावकर (गाते), राहुल मुरलीधर कोळी (पुरी), राहुल जीवन सोनार (निंभोरा बुद्रुक) या सहा जणांना पोलिसांनी अटक केली. त्यांना येथील न्यायालयात हजर केले असता, त्यांना १ ऑगस्टपर्यंत पोलिस कोठडीत रवानगी करण्यात आली. यामुळे शौचालय घोटाळ्यातील अटक झालेल्यांची संख्या आता १८ झाली आहे. यातील १० जणांना यापूर्वीच न्यायलयीन कोठडी मिळाली आहे, तर निवृत्त विस्ताराधिकारी डी. एच. सोनवणे व विस्ताराधिकारी दीपक संदानशिव यांची पोलिस कोठडीत रवानगी झाली आहे.