Jalgaon Unseasonal Rain : तासभर बरसला अवकाळी पाऊस; संकुलांच्या तळघरात साचले डबके

Jalgaon News : दोन दिवसांपासून ढगाळ वातावरण असलेल्या जळगाव शहरासह परिसरात शुक्रवारी (ता. २७) जोरदार पावसाने दाणादाण उडवली. अचानक आलेल्या पावसाने नागरिकांची त्रेधा उडाली, तर शहरात सुरू असलेल्या रस्ते डांबरीकरणावरही ‘पाणी’ फेरले. (Unseasonal rain for hour Jalgaon news)

यंदा ऐन उन्हाळ्यात पावसाने थैमान घातले आहे. जळगाव जिल्ह्यात काही दिवसांपासून वादळी वाऱ्यासह पाऊस हजेरी लावत आहे. जळगाव शहरातही गेल्या दोन- तीन दिवसांपासून अधूनमधून पावसाचे वातावरण तयार होत होते.

शुक्रवारी तासभर पाऊस

शुक्रवारी दुपारी तीनच्या सुमारास आकाशात ढगांनी एकच गर्दी केली. मेघगर्जनेसह जोरदार पावसाला अचानक सुरवात झाली. त्याआधी वादळी वाऱ्यानेही थैमान घातले. पावसामुळे नागरिकांची एकच धावपळ उडाली.

हेही वाचा : संतुलित आहारातून रोखा फॅटी लिव्हरचा आजार

वाऱ्यामुळे विविध ठिकाणच्या स्टॉल्सवरील ताडपत्री, पडद्या उडून गेल्या. दुपारी साडेचारनंतर जोरदार पाऊस सुरू झाला. जवळपास तासभर पडलेल्या जोरदार पावसाने व्यापारी संकुलांच्या तळघरात पाणी साचले. सायंकाळी उशिरापर्यंत पावसाची रिपरिप सुरूच होती.

डांबरीकरण ‘पाण्यात’

अनेक वर्षांपासून शहरातील रस्त्यांची कामे रखडली आहेत. रस्त्यांच्या दुरवस्थेने नागरिक त्रस्त आहेत. काही महिन्यांपासून रस्त्यांचे डांबरीकरण मार्गी लागले. त्यात तीन दिवसांपासून काव्यरत्नावली चौक ते महाबळपर्यंतच्या रस्त्याचे काम हाती घेतले होते. शुक्रवारीही हे काम सुरू होते. मात्र, नव्यानेच झालेले हे काम आजच्या पावसामुळे ‘पाण्यात’ गेले.