Jalgaon : भर पावसाळ्यात हंडाभर पाण्यासाठी भटकंती

जळगाव : तांत्रिक बिघाडामुळे शहरातील पाणीपुरवठ्याचे नियोजन कोलमडले आहे. नागरीकांना तीव्र पाणीटंचाईला सामोरे जावे लागत आहे. नागरिकांच्या घरात प्यायला पाणी नसताना सर्वच वार्डातील नगरसेवक नागरीकांना वाऱ्यावर सोडत गायब झाले आहेत. शहरातील संमिश्र लोकवस्ती असलेल्या गेंदालाल मिल, शिवाजीनगर, तांबापुरा मेहरुणसह शाहुनगरात पाण्यासाठी भटकंती करण्याची वेळ आली आहे. (water crisis during rainy season Latest Jalgaon News)

शाहुनगर भागात तब्बल चार मातब्बर नगरसेवकांचा परिसर असताना तीन दिवस झाले एकाही नगरसेवकाने साधी भेट देत पाण्याची विचारपूस केली नाही. नागरिकांना थोडेफार वापरण्यापुरते पाणी मिळावे यासाठी नुरानी मशिदीचे मौलवी इम्रान हाफीज, मुतवल्ली याकूब बांगी यांनी सकाळी दोन तास आणि संध्याकाळी दोन तास स्वतः बसून पाणी वाटप सुरु केले आहे.