कटुर्ले, अंबाडी, शेवग्यासह बरेच काही! आरोग्यसाठी वरदान रानभाज्यांची हिरवळ

जळगाव : रानभाज्या निरोगी स्वास्थ्यासाठी एक वरदान आहे. रानभाजी व त्याचा उपयोग आपल्या दैनंदिन आहारात असायला हवा. शेतकऱ्यांसाठी या पद्धतीने महोत्सव भरविण्याचा आम्ही मागील तीन वर्षांपासून प्रयत्न केला आहे. यापुढेही शेतकऱ्यांसाठी नेहमी आवश्यक असणाऱ्या गोष्टींसाठी जिल्हा प्रशासन सहकार्य करेल, अशी ग्वाही जिल्हाधिकारी अभिजित राऊत यांनी दिली.

शहरात कृषी विभाग, प्रकल्प संचालक (आत्मा) जळगाव व रोटरी क्लब ऑफ जळगाव वेस्ट यांच्यातर्फे बायलॉजिस्ट आयडियल ऑर्गनायझेशनच्या सहकार्याने एकदिवसीय रानभाजी महोत्सव झाला. त्याच्या उद्‌घाटनावेळी ते बोलत होते.

महोत्सवात जळगाव जिल्ह्यातील ५० शेतकरी व शेतकरी गटांनी विविध रानभाज्या व रानभाज्यांची पाककला शहरातील नागरिकांना विक्रीसाठी उपलब्ध करून दिली.

डॉ. दीक्षा पाटील यांनी पर्यवेक्षण करून शेतकरी व शेतकरी गटांची निवड केली. या महोत्सवात रावेर तालुक्यातील गारखेड्यापासून ते चाळीसगाव तालुक्यातील पिंपरीपर्यंत शेतकऱ्यांनी सहभाग नोंदविला. महोत्सवात रानभाज्या म्हणजे कटुर्ले, अंबाडी, शेवगा, हादगा, केळफूल, गवती चहा, करवंद, भोकर, कोरडे, काटेमठ, फांग, अंबाडी, शतावरी, पाथरी, सुरण, तरोटा, बांबू कंद आदी रानभाज्या विक्रीसाठी ठेवण्यात आल्या होत्या.

आमदार सुरेश भोळे, महापौर जयश्री महाजन, नाशिक विभागाचे विभागीय कृषी सहसंचालक मोहन वाघ, उपवनरक्षक विवेक हौसिंग, जिल्हाध्यक्ष कृषी अधिकारी संभाजी ठाकूर, प्रकल्प उपसंचालक अनिल भोकरे, प्रकल्प उपसंचालक कुर्बान तडवी, कृषी विकास अधिकारी वैभव शिंदे, रोटरी क्लबचे अध्यक्ष सुनील सुखवानी, सचिव विवेक काबरा, प्रकल्पप्रमुख योगेश भोळे आदी उपस्थित होते.

दरम्यान, महोत्सवात शेतकऱ्यांनी अंदाजे ८.२० क्विंटल रानभाज्यांची विक्री केली. त्यातून ८९ हजार ४०० रुपयांची उलाढाल झाली.