#WednesdayMotivation : ...आणि तिच्या घरात तब्बल चार वर्षांनी उजेड पडला

सकाळ वृत्तसेवा
Wednesday, 29 January 2020

घराचा प्रश्‍नही सुटणार
दीक्षाच्या जीर्ण घराचीही पाणीपट्टी व घरपट्टी थकली आहे. याबाबत बारामती तालुका पत्रकार संघाने पुढाकार घेतला आहे. त्यांच्या प्रयत्नाने राज्य सराफ महामंडळाचे उपाध्यक्ष किरण आळंदीकर, उद्योजक संतोष कोंढाळकर, सहायक पोलिस निरीक्षक सोमनाथ लांडे यांनी मदतीचा हात पुढे केला आहे. याबाबत सरपंच सुनंदा सोनवणे म्हणाल्या, ‘‘पंचायत समितीचे उपसभापती प्रदीप धापटे यांनी रेखा खवळे यांना इंदिरा आवास योजनेतून घरकुल देण्याचा आणि संजय गांधी निराधार योजना मिळवून देण्याचे आश्वासन दिले आहे.’

सोमेश्‍वरनगर - वाकी (ता. बारामती) येथील दीक्षा मिठू खवळे या मुलीला विजेअभावी घराबाहेरील हायमास्टच्या उजेडात दहावीचा अभ्यास करावा लागत होता. परंतु, वीजकंपनीच्या अधिकाऱ्यांनी विजेची थकबाकी स्वतः भरली आणि तिच्या घरात तब्बल चार वर्षांनी उजेड पडला. तिच्या जीर्ण घरासाठीही मदतीचा ओघही सुरू झाला आहे.

ताज्या बातम्यांसाठी डाऊनलोड करा ई-सकाळचे ऍप

रेखा खवळे ही परित्यक्ता महिला स्वतःच्या मालकीच्या निवाऱ्याअभावी मुलगी दीक्षासह वाकी गावात आई पार्वती भिसे यांच्या अत्यंत जीर्ण घरात राहात आहेत. वयोवृद्ध आईसह मनोरुग्ण भावाचाही त्या मोलमजुरी करून सांभाळ करत आहेत. मुलगी दीक्षा न्यू इंग्लिश स्कूल पांढरवस्ती या विद्यालयात चिकाटीने दहावीत गेली आहे. वडगाव निंबाळकर पोलिस ठाण्याचे फौजदार शरद वेताळ यांनी तिला पुस्तके, गणवेश व अन्य साहित्य घेऊन दिले आहे. 

मात्र, खवळे यांच्या घराचा वीजजोड थकबाकी साडेअकरा हजारांवर गेल्याने चार वर्षांपूर्वी तोडला होता. त्यात आता दहावीची परीक्षा जवळ आल्याने दीक्षा रात्रीच्या वेळी घराबाहेरील हायमास्टखाली बसून किंवा येरझाऱ्या घालून अभ्यास करत होती. याबाबतची माहिती समाजमाध्यमातून पसरली. त्यामुळे वीजकंपनीच्या सोमेश्वर उपविभागातील सर्व अधिकाऱ्यांनी स्वतःहूनच पुढाकार घेत तिची सर्व थकबाकी भरली. तिच्या घरी नवा मीटरही जोडून दिला. 

याबाबत वीज कंपनीचे उपविभागीय अधिकारी सचिन म्हेत्रे म्हणाले, ‘‘पूर्ण थकबाकी ऑनलाइन भरल्याशिवाय नवीन जोड देणे शक्‍य नव्हते. आमच्या उपविभागातील सगळ्या सहकाऱ्यांनी पुढाकार घेऊन थकबाकी भरून त्वरित नवीन जोड दिला.’’

लोकांच्या मदतीमुळे घरात उजेड पडला. आता पोरगी कितीही वेळ अभ्यास करू शकते. आता रेशनकार्ड वेगळे करून घ्यायचे आहे.
 - रेखा खवळे


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: diksha khavale home electricity humanity motivation