Accident: रोहा-कोलाड मार्गावर एसटीची स्कूल बसला धडक अन्..

Roha: रोहा-कोलाड मार्गावर दाट धुक्यातून ओव्हरटेक करताना एसटी बसचालकाने स्कूल बसला मागून जोरदार धडक दिल्याने अपघात झाला. अपघातात कोणतीही जीवितहानी झाली नसली, तरी विद्यार्थी किरकोळ जखमी झाले आहेत. त्यांना उपचारांसाठी डॉ. धूर्व यांच्या खासगी रुग्णालयात दाखल करण्यात आले. शनिवारी (ता. २) पहाटे साडेसहाच्या सुमारास हा अपघात घडला.

नारायण सीताराम (रा. हनुमाननगर, रोहा) हे शनिवारी सकाळी आपल्या ताब्यातील स्कूल बसमधून शाळकरी मुलांना रोह्याकडून कोलाडकडे घेऊन जात होते. दरम्यान, त्यांच्या मागून येणाऱ्या रोहा-तुळजापूर एसटी बसचा चालक स्कूल बसला ओव्हरटेक करत होता.

मात्र पहाटे दाट धुके असल्याने एसटीची स्कूल बसला मागून जोरदार धडक बसली. त्यामुळे स्कूल बस रस्त्याखाली उतरून सुदर्शन बस स्टॉपच्या भिंतीवर आदळली. या अपघातानंतर शालेय विद्यार्थ्यांना बसमधून बाहेर काढण्यात आले.

घटनेत काही विद्यार्थी किरकोळ जखमी झाले. तसेच स्कूल बसचेही नुकसान झाले. रोहा पोलिस ठाण्याचे पोलिस निरीक्षक प्रमोद बाबर यांच्या मार्गदर्शनाखाली पोलिस नाईक शिद अधिक तपास करीत आहेत.