चिपी विमानतळावरील तपासणीत आढळला कोरोना बाधित

सिंधुदुर्गनगरी : सिंधुदुर्ग जिल्ह्यातील चिपी विमानतळावर ८ डिसेंबर ते १३ डिसेंबर या कालावधीत उतरलेल्या ९६ परदेशी प्रवाशांपैकी तपासणीत एक प्रवासी कोरोना बाधित आढळला असल्याची माहिती जिल्हा आरोग्य अधिकारी डॉ. महेश खलीपे यांनी आज दिली.

सिंधुदुर्ग जिल्ह्यातील चिपी विमानतळावर परदेशी पर्यटक उतरू लागले असून ८ डिसेंबर ते १३ डिसेंबर या कालावधीत चिपी विमानतळावर एकूण ९६ परदेशी प्रवासी उतरले. त्यापैकी ७ दिवस पूर्ण झालेल्या २५ प्रवाशांची आर टी पी सी आर तपासणी करण्यात आली. त्यापैकी सावंतवाडी तालुक्यात एका व्यक्तीचा कोरोना साठीचा तपासणी अहवाल पॉझिटिव्ह आला आहे. त्याचा संपर्कातील ७ जणांचा कोरोना तपासणीसाठी अहवाल पुणे येथे पाठविण्यात आला आहे.

नव्याने पसरणाऱ्या ओमायक्रौन या आजाराच्या पार्श्वभूमीवर जिल्हा आरोग्य यंत्रणा सतर्क करण्यात आली आहे. जिल्ह्यात दाखल होणाऱ्या परदेशी पर्यटकांची तपासणी करण्यात येत आहे. ८ डिसेंबरपासून जिल्ह्यातील चिपी विमानतळावर उतरलेल्या ९६ प्रवाशांमध्ये वैभववाडी २, कणकवली ८, देवगड १५, मालवण ५, कुडाळ १०, वेंगुर्ला १५ सावंतवाडी ३६,तर दोडामार्ग ५,असे एकूण ९६ प्रवासी दाखल झाले. त्यामध्ये सावंतवाडी तालुक्यातील १ प्रवासी कोरोना पॉझिटिव्ह आढळला आहे. अशी माहिती जिल्हा आरोग्य अधिकारी डॉ. महेश खलिपे यांनी आज दिली.