Deepak Kesarkar : '..तर दीपक केसरकर भाजपमध्ये जातील'; ठाकरे गटाच्या प्रवक्त्याचा मोठा गौप्यस्फोट

सावंतवाडी : राज्यात मंत्रिमंडळ विस्तारावरून (Cabinet Expansion) गदारोळ सुरू आहे. या धामधुमीत शिवसेनेतून (Shiv Sena) बंडखोरी करून शिंदे गटात गेलेल्या आमदार दीपक केसरकर (Deepak Kesarkar) यांचे मंत्रिपद टिकेल, की ते आता भाजपमध्ये जातील, असा प्रश्न ठाकरे शिवसेनेचे प्रवक्ते डॉ. जयेंद्र परुळेकर यांनी केला आहे.

महाविकास आघाडी सरकारच्या काळात निधी देताना अन्याय केला, असे सांगणारे केसरकर आता अजित पवारांच्या (Ajit Pawar) मागे धावताना दिसले. हा प्रकार म्हणजे लाचारी नाही का? की ते जनतेची दिशाभूल करीत आहेत?, असा प्रश्नही त्यांनी (Dr. Jayendra Parulekar) केला आहे.

याबाबत डॉ. परुळेकर यांनी प्रसिद्धी पत्रक दिले आहे. त्यात म्हटले आहे, की राज्यात मंत्रिमंडळ विस्ताराच्या हालचाली सुरू आहेत. आता विस्तार करताना शिंदे गटातील मंत्र्यांना बाजूला करून त्या ठिकाणी अजित पवारांसोबत असलेल्या आमदारांना मंत्रिपदे द्यावीत, असा विचार सुरू आहे.

त्यावरून शिंदे गटात जोरदार रस्सीखेच सुरू आहे. त्यामुळे आयत्यावेळी असे झाल्यास केसरकरांकडे असलेले मंत्रिपद राहील का? हा प्रश्न आहे. दुसरीकडे रवींद्र चव्हाण यांच्याकडे दोन पालकमंत्री पदे आहेत. त्यामुळे त्यांना अन्य ठिकाणची जबाबदारी दिल्यास जिल्ह्याला नवा पालकमंत्री मिळेल का, असाही प्रश्न त्यांनी केला आहे.

दरम्यान, राज्यात सुरू असलेल्या सत्ताधाऱ्यांच्या नाट्याबाबत त्यांनी डॉ. परुळेकर यांनी नाराजी व्यक्त केली आहे. हा सर्व प्रकार म्हणजे सर्कस असल्याचे त्यांचे म्हणणे असून हा ‘हायजॅक ड्रामा’ जास्त काळ चालणार नसल्याचे त्यांनी म्हटले आहे.