व्वा रे बहाद्दर! गाडीचा हॉर्न वाजवत गव्यांच्या कळपातून काढली वाट

बांदा (सिंधुदुर्ग) : बांदा - शिरोडा मार्गावरील पाडलोस - इटलादेवी येथे रात्रंदिवस गव्यांचा वावर नेहमी वाढतच चालला आहे. भातशेतीसह अन्य पिकांची नासधूस करणारे गवे आज चक्क रस्त्यावरच ठाण मांडून होते. त्याच दरम्यान येथून जाणाऱ्या दुचाकीस्वाराने हॉर्न वाजवत आरडाओरड केल्याने गव्यांनी आपला पाय जंगलाच्या दिशेने वळवला. गवे वाहतूक रोखत असल्यामुळे येथून ये-जा करणाऱ्या दुचाकीस्वारांत भीतीचे वातावरण निर्माण झाले आहे.

पाडलोस-इटलादेवी येथून सकाळी साडेसातच्या सुमारास न्हावेलीतील दुचाकीस्वार शालू फर्नांडिस हे बांद्याच्या दिशेने जाताना केणीवाड्याच्या पुढे पाडलोस-इटलादेवी येथे पोहोचले असता उतरणीवर त्यांना दहा ते पंधरा गव्यांचा कळप अचानक रस्त्यासमोर दिसला. नेहमीच होणाऱ्या गव्यांच्या दर्शनामुळे  फर्नांडिस घाबरले नाहीत. गव्यांनी काही वेळ वाहतूक रोखून धरली; परंतु प्रसंगावान राखत गाडीचा हॉर्न वाजवत त्यांनी त्या गव्यांना पळवून लावले.

हेही वाचा - फसवणूक प्रकरणी माजी सभापतींना अटक ; शासकीय निधीचा केला अपहार -

वन विभागाजवळ वन्यप्राण्यांचा बंदोबस्त करण्याची वारंवार मागणी करूनही निदान ‘गव्यांचा अधिवास’ असा फलक लावण्याची तसदीही वन विभाग घेत नसल्यामुळे वाहनचालकांसह नागरिकांमधून नाराजी व्यक्त होत आहे.

संपादन - स्नेहल कदम