चिपळूण : पोफळी परिसरात बिबट्याचे दर्शन

चिपळूण : एप्रिलमध्ये जंगलातील पाण्याचे नैसर्गिक स्रोत आटल्याने पाण्याच्या शोधात वन्यप्राण्यांची भ्रमंती सुरू झाली आहे. पोफळी परिसरात बिबट्याचे दिवसाढवळ्या दर्शन होत आहे.पोफळी, अलोरे, कोळकेवाडी, कुंभार्ली, तळसर, मुंढे या परिसरात बिबट्यासह इतर प्राण्यांचे दिवसा तर कधी सांयकाळी दर्शन होत आहे. कुंभार्ली घाटातून प्रवास करताना सायंकाळी बिबट्याचे दर्शन झाल्याचे या मार्गावरून प्रवास करणारे मुश्ताक चौगुले यांनी सांगितले. पाळीव जनावरांवर तसेच मनुष्यावर या हिंस्त्र प्राण्याकडून कधी हल्ला होईल, याची शाश्वती नसल्याने नागरिकांकडून भीती व्यक्त होत आहे. काही दिवसांपूर्वी अलोरे, पोफळी पवारवाडी, धनगरवाडी येथे बिबट्याने पाळीव प्राण्यावर हल्ला केला होता.

सध्या तापमानात दिवसेंदिवस वाढ होत असताना जंगलातील नैसर्गिक पाणवठे आटत चालले आहेत. याचाच परिणाम म्हणून बिबटे व इतर प्राणी पाण्याच्या शोधात मानवीवस्ती लगतच्या पाणवठ्यावर येत आहेत.

कोयनेच्या जंगलासह कुंभार्ली घाटात अधिवास..

कोयनेच्या जंगलात आणि कुंभार्ली घाट परिसरात बिबट्यांची संख्या मोठ्या प्रमाणात आहे. याबाबत अद्यापही अधिकृत आकडा जाहीर नसला तरी जिल्ह्यात बिबट्याकडून होणारे हल्ले आणि त्यांचे वारंवार घडणारे दर्शन यातून ते ठळक होते. उन्हाळ्याच्या दिवसांमध्ये जंगली प्राणी पाण्याच्या शोधात आपल्या नैसर्गिक अधिवासातून दुसरीकडे भ्रमंती करतात.

वनविभाग केवळ आपल्या अत्खत्यारित असलेल्या जंगलातच पाणवठे स्वच्छ करण्याचे उपक्रम हाती घेत आहे. मात्र, खासगी जंगलातील पाणवठे नष्ट होत चालल्याने या दिवसात जंगली प्राण्याचे पाण्यावाचून हाल होतात. त्यासाठीही वनविभागाकडून पाऊले उचलण्याची गरज आहे.

- पंकज कदम, अलोरे

जंगलातील पाण्याचे स्त्रोत आटल्याने या दिवसात जंगली प्राणी वस्तीनजीक दिसून येतात. त्यातून प्राण्याची शिकर होते. सध्या बिबट्याचे होणारे दर्शन हा त्याचाच एक भाग आहे. पाण्यासाठी जंगलातील पाणवठे स्वच्छ करण्याची मोहीम हाती घेतली आहे.

- सदफ कडवेकर, प्राणीमित्र, पोफळी