नगरपंचायत आरक्षणात आता मतदारसंघ शोधावे लागणार

दोडामार्ग (सिंधुदुर्ग) : तालुक्‍याचे लक्ष लागलेल्या कसई दोडामार्ग नगरपंचायतीचे प्रभाग आरक्षण आज सोडत पद्धतीने जाहीर झाले. नव्या आरक्षणामुळे पुन्हा नशीब आजमावू पाहणाऱ्या दिग्गजांना सुरक्षित प्रभाग शोधावा लागणार आहे.

नगराध्यक्षा लीना कुबल, माजी नगराध्यक्ष संतोष नानचे, उपनगराध्यक्ष चेतन चव्हाण, गेल्या पाच वर्षांत मनसेचा एकमेव सदस्य असूनही सत्तेची चावी आपल्या हातात ठेवलेले नगरसेवक रामचंद्र ठाकूर यांच्यासह बहुतेक नगरसेवकांना निवडणूक लढवण्यासाठी दुसऱ्या प्रभागातून उभे राहावे लागणार आहे.
मागच्या वेळी सर्वसाधारण पुरुष जागेसाठी आरक्षित असलेले प्रभाग महिलांसाठी तर महिलांसाठी आरक्षित असलेले प्रभाग खुले झाल्याने पूर्वीच्या नगरसेवकांना विजयासाठी मोठी कसरत करावी लागणार आहे.

हेही वाचा - बिहारच्या निवडणुकीत शिवसेनेला आपली जागा समजली -

नगरपंचायतीच्या दुसऱ्या सार्वत्रिक निवडणुकीसाठीच्या आरक्षणाची सोडत चिन्मयी खानोलकर आणि चेतन नाईक या मुलांच्या हस्ते आज काढण्यात आली. येथील महाराजा हॉटेलच्या सभागृहात आरक्षण सोडत काढण्यात आली. यावेळी पीठासन अधिकारी म्हणून प्रांताधिकारी वंदना खरमाळे यांनी काम पाहिले. यावेळी तहसीलदार अरुण खानोलकर, मुख्याधिकारी शिवराज गायकवाड, नायब तहसीलदार श्रीधर पाटील आदी उपस्थित होते.

सर्वसाधारण पुरुष प्रवर्गासाठी प्रभाग क्रमांक दोन, पाच सहा, सात, नऊ आणि अकरा तर सर्वसाधारण स्त्री प्रवर्गासाठी प्रभाग क्रमांक एक, बारा, तेरा, पंधरा आणि सोळा आरक्षित झाले आहेत. इतर मागासवर्गीय पुरुषांसाठी प्रभाग क्रमांक तीन व आठ तर इतर मागासवर्गीय स्त्री करिता प्रभाग क्रमांक चार, दहा आणि सतरा आरक्षित झाले आहेत. मागच्या वेळी अनुसूचित जाती पुरुषासाठी राखीव असलेला प्रभाग क्रमांक बारा सर्वसाधारण महिलांसाठी आरक्षित झाला आहे.

प्रभाग क्रमांक चौदा अनुसूचित स्त्री प्रवर्गासाठी राखीव झाला आहे. विद्यमान नगराध्यक्षा लीना कुबल यांचा प्रभाग क्रमांक नऊ सर्वसाधारण प्रवर्गासाठी, माजी नगराध्यक्ष संतोष नानचे यांचा प्रभाग क्रमांक चार आणि उपनगराध्यक्ष चेतन चव्हाण यांचा प्रभाग क्रमांक दहा इतर मागासवर्गीय महिलांसाठी राखीव आहे.

हेही वाचा -  उपमुख्यमंत्री अजित पवार आणि माझे संबंध घनिष्ठ आहेतच ; मंत्रिपदाबाबत मात्र येणारा काळच उत्तर देईल -

संपादन - स्नेहल कदम