मंडणगडातील क्वारंटाईनमधील एकाला कोरोनाची लागण 

मंडणगड - घोडबंदर रोड ठाणे येथून आपल्या तीन सहकाऱ्यांसह पायी चालत आलेला व ५ मे रोजी मंडणगड शहरातील कोरंटाईन सेंटरमध्ये दाखल करण्यात आलेला बावीस वर्षीय युवक कोरोना पॉझीटीव्ह असल्याचे आज स्पष्ट झाल्याने शहरात खळबळ उडाली असून प्रशासकीय यंत्रणा हाय अलर्टवर आली आहे.  

कोरना बाधीत तरुण हा खेड तालुक्यातील बहीरवली गावाचा रहिवासी असून त्याला तीन साथीदारासंह मंडणगड तालुक्यातील म्हाप्रळ चेक पोस्ट येथे ५ मे २०२० रोजी ताब्यात घेऊन शहरातील विलगीकरण कक्षात कोरंटाईन करण्यात आले होते. या संदर्भात तहसीलदार नारायण वेगर्लेकर यांनी दिलेल्या माहीतीनुसार, हा तरुण आपल्या अन्य सहकाऱ्यांसमवेत ठाणे घोडबंदर परिसरातून पायी चालत आला आहे. मंडणगड शहरातील कोरंटाईन सेंटरमध्ये कोरंटाईन करण्यात आलेल्या ५० जणांचे स्वब तपासणीसाठी मिरज येथे पाठवण्यात आले होते. त्यातील सुरुवातीस ३९ जणांचे नंतर ४ स्वब रिपोर्ट निगेटीव्ह आले. मात्र उर्वरीत स्वब पैकी खेडमधील या तीन तरुणांपैकी एकाचा अहवाल हा पॉझीटीव्ह आला आहे. तर अन्य दोघांचे अहवाल निगेटिव्ह आले आहेत. तसेच कोरोना बाधीत रुग्णांचे समवेत कोरंटाईन सेंटरमध्ये असणारे अन्य ६ जणांचे अहवाल निगेटीव्ह आले आहेत. कोरोना बाधीत तरुणास खेड कंळबणी उपजिल्हा रुग्णालय येथे पुढील उपचारासाठी पाठवण्यात येणार असल्याची माहीती तहसीलदार नारायण वेगुर्लेकर यांनी दिली आहे.

मुंबई, पुण्यातील नागरिकांची पावले गावाकडे
 
कोरोना विषाणू संसर्गाचा प्रभाव टाळण्यासाठी राज्यात सर्वत्र लॉक डाऊन सुरु असतानाही मुंबई महानगर, उपनगरांचा भाग तसेच पुणे येथून गावी पायी चालत येणाऱ्यांची संख्या घटत नसल्याने स्थानीक प्रशासनाचेवतीने विविध उपाययोजना करण्यात आल्या असून २९ एप्रिल २०२० पासून तालुक्यात दाखल होणाऱ्या सगळ्यांचाच स्वॅब घेऊन त्याची तपासणी केली जात आहे. याचबरोबर मंडणगड तालुक्यास पुणे व मुंबई या दोन महानगरांना जोडणारे म्हाप्रळ व लाटवण या दोन्ही मार्गावरील सर्व प्रकारच्या वाहनांची वाहतूक बंद करण्यात आली आहे. सर्व वाहतूक कशेडी मार्गाने सुरु आहे. तेथे प्रशासनाकडून स्वॅब घेऊन सर्व सोपस्कर पूर्ण झाल्यानंतरच मंडणगड व दापोली तालुक्यात प्रवेशाची अनुमती मिळत आहे. असे असले तरी आड मार्गाने तसेच विविध प्रकाराने तालुक्यात पायी चालत येणाऱ्यांचे प्रमाण कमी झालेले नाही. दररोज अनेकजण पायी चालत दाखल होत आहेत. त्यांना प्रशासन ताब्यात घेऊन कोरंटाईन करत आहे. यामध्ये दापोली व खेड तालुक्यातील नागरिकांचा लक्षणीय समावेश असल्याची माहीती पुढे आली आहे. ८ मे २०२० रोजी सायंकाळी उशीरापर्यंत सुमारे पन्नास नागरीक मुंबई येथून पायी चालत येऊन तालुक्यात दाखल झाल्याची माहीती प्राप्त झाली आहे. दापोली येथील ३३ नागरिकांचा समावेश आहे. वाहनांची उपलब्धता नसल्याने या नागरिकांची वाहतूक करण्यास प्रशासनास अडचणी येत आहेत.

हे पण वाचा - अखेर निर्णय झाला ; पदवी व पदव्युत्तरच्या अंतिम वर्षाच्या परीक्षा या तारखेला होणार
 

हे पण वाचा - रत्नागिरीत आणखी चार जणांना कोरोनाची लागण