गुहागर (रत्नागिरी) : तालुक्यातील निगुंडळ येथील खडी क्रशरवर उभ्या असलेल्या पोकलेनचे सुमारे ७ लाखांचे १० पितळी पिस्टन चोरीला गेल्याची घटना १९ जानेवारीला रात्री घडली होती. या घटनेमध्ये रुपकिशोर महतो याला गुहागर पोलिसांनी इस्लामपूर (वाळवा, सांगली) येथून अटक केली आहे. बेपत्ता झालेल्या किशोर महतो याचाही शोध पोलिस घेत आहेत.
२० जानेवारीला आनंद जगदाळे (रा. पेडगाव, ता. खटाव, जि. सातारा) यांनी गुहागर पोलिस ठाण्यात पोकलेनचे ७ लाखांचे पितळी पिस्टन चोरीला गेल्याची तक्रार दाखल केली होती. पोलिस निरीक्षक अरविंद बोडके व सहा. पोलिस निरीक्षक बी. के. जाधव यांचे मार्गदर्शनाखाली या घटनेचा तपास करताना अंमलदार हनुमंत नलावडे यांनी किशोर महतोचे मोबाईल कॉल्सची तपासणी केली. त्यामध्ये किशोरचा भाऊ रुपकिशोर महतो हा १९ जानेवारीला गुन्हा घडल्याच्या रात्री निगुंडळ परिसरात आल्याचे लक्षात आले.
पोलिसांना रुपकिशोर महतो सांगली जिल्ह्यातील वाळवा तालुक्यातील इस्लामपूर येथे असल्याचे समजले. पोलिसांनी ५ फेब्रुवारीला इस्लामपूरला रुपकिशोर महतोला अटक केली. ६ फेब्रुवारीला त्याला न्यायालयात हजर करून पोलिस कोठडी मागितली. रुपकिशोर महतोने त्याचा भाऊ किशोर महतो याच्यासोबत पिस्टन चोरल्याचे कबुल केले. हे पिस्टन फुरसुंगी पुणे येथे ठेवल्याचे सांगितले. पोलिस उपनिरीक्षक दीपक कदम आणि त्यांच्या टिमने फुरसुंगीत जावून ते पितळी पिस्टन (मुद्देमाल) ताब्यात घेतला आहे. यातील मुख्य आरोपी किशोर महतो अजून फरार आहे.
पगार दिला नाही म्हणून केली चोरी
पोलिस सुत्रांकडून मिळालेल्या माहितीप्रमाणे या प्रकरणातील मुख्य आरोपी किशोर महतोला पोकलेन मालक जगदाळे यांनी पगार दिला नसल्याचे आरोपीने सांगितले. अनेकवेळा मागणी करूनही पगार न दिल्याच्या रागातून मालकाला अद्दल घडविण्यासाठी त्यांनी पिस्टन चोरले.
संपादन - स्नेहल कदम
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.