डिंगणे ग्रामपंचायतीने केलीये `ही` मागणी

बांदा ( सिंधुदुर्ग ) - कोरोना विषाणूचा प्रादुर्भाव वाढल्यामुळे गोवा व महाराष्ट्र राज्यांच्या सीमाभागातून जाणारा बांदा-आरोसबाग-नेतर्डे रस्ता वाहतुकीस पूर्णपणे बंद आहे. बांदा बाजारपेठेवर अवलंबून असलेल्या डिंगणे, डोंगरपाल, गाळेल व नेतर्डे गावांतील ग्रामस्थांना सहा किलोमीटरचा अधिकचा प्रवास करावा लागत असल्याने मोठ्या प्रमाणात आर्थिक त्रास सहन करावा लागत आहे. त्यामुळे या रस्त्यावरून चारही गावांतील नागरिकांना ओळखपत्र पाहून ये-जा करण्यास परवानगी मिळावी, अशी मागणी डिंगणे ग्रुप ग्रामपंचायतीतर्फे सावंतवाडी तहसीलदार व बांदा पोलिस ठाण्यात निवेदनाद्वारे करण्यात आली आहे. 

बांदा पोलिसांत पोलिस निरीक्षक अनिल जाधव यांना डिंगणेचे माजी उपसरपंच रोहित नाडकर्णी व विद्यमान उपसरपंच जयेश सावंत यांनी निवेदन दिले. यात म्हटले आहे की, पत्रादेवी लंगारबाग दत्त मंदिरजवळून बांदा-आरोसबाग-नेतर्डे असा मार्ग आहे. या मार्गे डिंगणे, गाळेल, डोंगरपाल व नेतर्डे गावांची रहदारी मोठ्या प्रमाणावर असते; परंतु सद्यस्थितीत चारही गावांतील ग्रामस्थांना सहा किमीचा अधिकचा प्रवास करत डिंगणे-बांबरवाडीमार्गे बांदा येथे बाजारपेठ तसेच अन्य कामासाठी जावे लागते.

त्यामुळे डिंगणे-बांबरवाडीमार्गे बांदा रस्त्यावर मोठ्या प्रमाणावर वाहनांची कोंडी होते. एसटी वाहतूक सेवा पूर्णपणे बंद असल्याने खासगी वाहनांद्वारे प्रवास करावा लागत आहे. त्यात आर्थिक नुकसान होत आहे. त्यामुळे बांदा-आरोसबाग-नेतर्डे रस्त्यावरून डिंगणे, गाळेल, डोंगरपाल व नेतर्डे गावांतील ग्रामस्थांना ओळखपत्राची पडताळणी करून ये-जा करण्यासाठी परवानगी द्यावी, अशी मागणी डिंगणे ग्रामपंचायतीतर्फे करण्यात आली आहे. 

गणेशोत्सवात होणार दमछाक 

डिंगणे, गाळेल, डोंगरपाल व नेतर्डे गावांतील ग्रामस्थांना गणेशोत्सवासाठी लागणारे साहित्य आणण्यासाठी बांदा बाजारपेठेत यावे लागते; परंतु बांदा-आरोसबाग-नेतर्डे रस्ता वाहतुकीस बंद असल्याने ग्रामस्थांची मोठी दमछाक होणार आहे. प्रशासनाने यावर योग्य तो तोडगा काढून ग्रामस्थांची झालेली अडचण सोडवावी, अशी मागणी उपसरपंच जयेश सावंत यांनी केली आहे.