बिग बास्केटकडून हापूससह "काजू बी' खरेदी 

रत्नागिरी - कोकणातून तीन कोटींचा हापूस खरेदी करून त्याची संपूर्ण देशभरात विक्री करणाऱ्या बिग बास्केट ऑनलाईन कंपनीने कोकणातील काजू बी खरेदीसाठी पावले उचलली आहेत. प्रायोगिक तत्त्वावर लांजा, राजापूर तालुक्‍यातील शेतकऱ्यांशी संवादही साधला आहे. गुणवत्तेनुसार काजू बी खरेदी करून त्यावर प्रक्रिया करून त्याची देशभरातील विक्री होणार आहे. त्यासाठी थेट शेतकऱ्यांकडून बाजारापेक्षा अधिक दर देऊन काजू बीची खरेदी करण्यात येणार आहे. 

कोकणातून लाखो टन काजू बी प्रक्रियेसाठी परराज्यात जातो. आठवडा बाजार, प्रक्रिया कंपन्या किंवा स्थानिक दुकानदार हीच खरेदीची केंद्र आहेत. कोकणातील काजूगराला देशातच नव्हे तर परदेशात मोठी मागणी आहे. हे लक्षात घेऊन बिग बास्केट कंपनी काजू उद्योगात आली आहे. गेली तीन वर्षे कोकणातील बागायतदारांकडून आंबा खरेदी करून तो ऑनलाईनने दिल्ली, बंगळूरपासून देशभरात विकला जात आहे.

हेही वाचा - गद्रे - सावरकर भेटीचा काय आहे इतिहास ? 

फळभाज्या आणि किराणा माल ऑनलाईन विक्रीत ओळख असलेल्या बिग बास्केट कंपनीने आता काजू बीच्या खरेदीसाठी यंत्रणा राबविण्याचा निर्णय घेतला आहे. त्यासाठी गुणवत्ता तपासून म्हणजेच बीमधील आर्द्रता तपासून शेतकऱ्यांना दीड ते दोन टक्‍के जादा दर दिला जाणार आहे. तसेच सरसकट बी घेतानाही बाजारातील दरापेक्षा पाच ते सात रुपये अधिक शेतकऱ्यांना दिले जाणार आहेत. 

दरम्यान, काजू बी खरेदीसाठी बीग बास्केट कंपनी आणि पणन महामंडळाने लांजा येथील गवाणे आणि राजापूर येथे कार्यशाळा घेतली. त्यावेळी सुमारे पाचशेहून अधिक काजू बागायतदार उपस्थित होते. गुणवत्तापूर्ण काजू बी कशी असावी याचे मार्गदर्शन कोकण कृषी विद्यापिठाचे विस्तार शिक्षण संचालक डॉ. संजय भावे यांनी मार्गदर्शन केले. यावेळी पणनचे मिलिंद जोशी, शास्त्रज्ञ डॉ. वैभव शिंदे, जयवंत विचारे, कंपनीतर्फे केतन चौधरी, जयदीप सूर्यवंशी उपस्थित होते. 

बागायतदारांसाठी हे करणार 

• बी ची प्रथमच ग्रेडींग करून खरेदी 
• ऑनलाईन पेमेंट 
• खरेदीची रिसीट 
• बाजारापेक्षा अधिक दर 
• वजन-काटे पारदर्शक 

आतापर्यंत सरसकट काजू बीची खरेदी करून स्थानिक व्यावसायिक विक्री करत होते; मात्र ऑनलाईन मार्केटमधील बीग बॉस या कंपनीने गुणवत्तेनुसार जादा दर देऊन काजू बी खरेदी करण्याचा निर्णय घेतला आहे. 
- मिलिंद जोशी, सहाय्यक सरव्यवस्थापक, पणन 

काजू बी खरेदसाठी प्रथमच कंपनीने प्रयत्न सुरू केले आहेत. त्यासाठी विक्री केंद्र उभारली जातील. थेट शेतकऱ्यांकडून दर्जेदार बी खरेदी करून गुणवत्तापूर्ण काजूगर बाजारात उपलब्ध करून देण्यासाठी कंपनीचा प्रयत्न आहे. कोकणच्या हापूसला चांगला प्रतिसाद मिळत आहे. 
- जयदीप सूर्यवंशी, बिग बास्केटचे अधिकारी