तपास अधिकाऱ्यांकडून नितेश राणेंना पोलिस कोठडीची मागणी

कणकवली - नितेश राणे कणकवली न्यायालयात शरण आले असून थोड्याच वेळात पोलिस आपले म्हणणे मांडणार आहेत. सरकारी वकील प्रदीप धरत हे सरकाच्या वतीने बाजू मांडणार आहेत. त्यामुळे नितेश राणे यांना पोलिस कोठडी होणार की अन्य निर्णय होणार याबाबतची उलट सुलट चर्चा सुरु आहे. आमदार नितेश राणे हे काही वेळापूर्वीच कणकवली न्यायालयात हजर झाले आहेत. त्यांच्यासोबत वकिलांचा पोस्ट फाटा आहे. न्यायालयाच्या आवारात माध्यमांना प्रवेश नाकारण्यात आला आहे. त्यामुळे न्यायालयाच्या बाहेर माध्यमांची गर्दी आहे.

दरम्यान, संपूर्ण परिसराला पोलिसांच्या छावनीचे स्वरुप प्राप्त झाले आहे. न्यायालयाच्या परिसरात तणावपूर्ण वातावरण निर्माण झाले आहे. शिवसेना कार्यकर्ते संतोष परब यांच्यावर 18 डिसेंबरला झालेल्या हल्ल्याप्रकरणी नितेश राणे यांच्यावर थेटपणे संशयाची सुई वळली होती. पोलिस तपासातही त्यात पुरावे सापडल्याने नितेश राणे यांच्या अडचणीत वाढ झाली. जिल्हा सत्र न्यायालयापासून सर्वोच्च न्यायालयाचे दरवाजे ठोठावले तरीही त्यांना पुन्हा एकदा कणकवलीच्या मॅजेस्टिककडे शरण येण्याची वेळ आली आहे. ही प्रक्रिया आता सुरू असून काही वेळातच राणेंच्या कोठडी बाबतचा निर्णय होणार आहे.