नारायण राणेंची जनआशीर्वाद यात्रा सुरु

रत्नागिरी : नारायण राणेंच्या स्वागताचे बॅनर्स विविध ठिकाणी झळकले असून, भाजप कार्यालयात त्यांचा जंगी सत्कार होणार आहे. राणे हेलिकॉप्टरने जुहू विमानतळ येथून निघून रत्नागिरी विमानतळावर दाखल झाले आहेत. रत्नागिरीत भाजपकडून ढोल ताशाच्या गजरात नारायण राणे यांचं जंगी स्वागत करण्यात येतंय . यावेळी त्यांच्या सोबत भाजपचे नेते आशिष शेलार,प्रसाद लाड ‌आहेत. राणे यांच्या तिसऱ्या जनआशीर्वाद यात्रेला सुरुवात झाली आहे. केंद्रीय मंत्री राणे हे आज दिवसभर रत्नागिरी शहर, हातखंबा, पाली, लांजा, राजापूर, खारेपाटण, कणकवली शहर, कणकवली येथे होणाऱ्या नागरी कार्यक्रमांना उपस्थित राहतील.

केंद्रीय सूक्ष्म, लघु व मध्यम उद्योग मंत्री नारायण राणे यांची जनआशीर्वाद यात्रा राणेंना अटक, जामीन, सेना विरुद्ध राणे, भाजप अशा कारणांमुळे देशभर गाजली आणि जनआशीर्वाद यात्रा राणेंना दीड दिवस स्थगित करावी लागली. आता ही यात्रा आजपासून रत्नागिरी शहरातून सुरू होणार असल्याने भाजप कार्यकर्त्यांमध्ये उत्साहाचे वातावरण निर्माण झाले आहे.

राणे सकाळी मारुती मंदिर येथील छत्रपती शिवाजी महाराज, शामराव पेजे, डॉ. बाबासाहेब आंबेडकर यांच्या पुतळ्यांना वंदन करून गोळप येथे आंबा प्रक्रिया उद्योजक विजय देसाई फॅक्टरीला भेट देतील आणि आंबा बागायतदार, आंबा कॅनिंग, काजू उत्पादक प्रतिनिधींशी चर्चा करतील. यावेळी त्यांचा सत्कार करण्यात येणार आहे. त्यानंतर दक्षिण रत्नागिरी भाजप कार्यालयात राणे यांचा सत्कार होणार असून, ते कार्यकर्त्यांना मार्गदर्शन करतील. दुपारी विविध प्रतिनिधी मंडळे राणे यांची भेट घेऊन स्वागत करणार आहेत. राणे लोकमान्य टिळक जन्मस्थानाला भेट देणार आहेत. कुवारबाव भाजप कार्यालयाला सदिच्छा भेट व लाभार्थी नागरिकांची भेट घेऊन राणे लांज्याकडे रवाना होतील. तिथे भाजप कार्यकर्ते त्यांचा सत्कार करणार आहेत. राजापूरलाही कार्यकर्ते सत्कार करणार आहेत.