रत्नागिरीत महावितरणची थकबाकी वाढतीच; रक्कम 58 कोटींवर

रत्नागिरी : महावितरण कंपनीच्या (mahavitaran) थकबाकीचा आकडा वाढतच चालला आहे. ग्राहकांप्रति सहानुभूती दाखवून तडकाफडकी कारवाई नको, म्हणून थकबाकीदारांच्या जोडण्या अजून कंपनीने तोडलेल्या नाहीत. मात्र आता ती वेळ येणार आहे. जिल्ह्यात ५७ कोटीची असलेली थकबाकी (ratnagiri district) आता काही दिवसांमध्ये ५८ कोटी ४६ लाखावर गेली आहे. यामध्ये १ लाख ६७ हजार २७१ ग्राहकांचा समावेश आहे. तर शासकीय थकबाकी १ कोटी ६६ लाख आहे.

महावितरण कंपनीची आर्थिक परिस्थिती अतिशय नाजूक बनली आहे. राज्यात ही थकबाकी ६० हजार कोटींच्यावर आहे. थकबाकी वसुलीचे मोठे आव्हान कंपनीसमोर आहे. कंपनीने थकबाकीदारांना अनेक नोटीसा दिल्या आहेत. कर्मचारी पाठवून त्यांना बील भरण्याबाबत प्रवृत्त करण्याचा प्रयत्न केला. मात्र त्याला फारसे यश आले नाही. कंपनी आर्थिक अडचणीत सापडल्यामुळे वसुलीसाठी नवा फंडा काढला आहे. सहा संचालकांना परिमंडळनिहाय वसुलीसाठी फिल्डवर काढले आहे. कोकण परिमंडळाला गडकरी यांची नियुक्ती केली आहे.

थकबाकीमध्ये जिल्ह्याचा आकडा देखील मोठा आहे. काही दिवसांपूर्वी ५७ कोटीची थकबाकी आता ५८ कोटी ४६ लाखांवर गेली आहे. यामध्ये १ लाख ६७ हजार २७१ ग्राहकांचा समावेश आहे. १ लाख ३२ हजार ०३६ घरगुती ग्राहकांची २४ कोटी ८१ लाख, १८ हजार ०३३ व्यापारी ग्राहकांची ११ कोटी, २ हजार ३३५ उद्योजकांची ६ कोटी थकबाकी आहे. शासकीय थकबाकी १ कोटी ६६ लाखावर आहे. यामध्ये शाळा, ग्रामपंचायती, शासकीय कार्यालये आदींचा समावेश आहे.

थकबाकीदारांकडुन वसुलीसाठी आता कठोर कारवाई करण्याची गरज असल्याचे मुख्य अभियंता सायनेकर यांनी स्पष्ट केले होते. थकबाकीदारांवर कारवाई न केल्यास स्थानिक पातळीवरील कंपनीच्या अधिकारी, कर्मचाऱ्यांवर कारवाई करण्याचा इशारा दिला होता. या बडग्यामुळे कंपनीचे अधिकारी अडचणीत येऊन ग्राहकांचा कंपनीवरील विश्वास ढळू नये, यासाठी ग्राहकांना अनेक सवलीत दिल्या आहेत. मात्र आता कंपनीच अडचणीत आल्याने कठोर कारवाई विषय महावितरणपुढे पर्याय नाही.

दृष्टिक्षेपात

• महावितरण थकबाकी - ५८ कोटी ४६ लाख

• ग्राहकांची एकूण संख्या - १ लाख ६७ हजार २७१

• घरगुती ग्राहक - १ लाख ३२ हजार ०३६

• घरगुती ग्राहक थकबाकी - २४ कोटी ८१ लाख

• व्यापारी ग्राहक - १८ हजार ०३३

• व्यापारी ग्राहकांची थकबाकी - ११ कोटी

• उद्योजक ग्राहक - २ हजार ३३५

• उद्योजकांची थकबाकी - ६ कोटी

• शासकीय थकबाकी - १ कोटी ६६ लाख