कोकण : राष्ट्रवादीमधील धुसफूस थेट शरद पवारांपर्यंत

चिपळूण (रत्नागिरी) : जिल्हा नियोजन समिती सदस्यपदी राष्ट्रवादी काँग्रेसचे जिल्हाध्यक्ष बाबाजी जाधव आणि चिपळूण विधानसभा क्षेत्राध्यक्ष दादा साळवी यांची वर्णी लागली. या निवडी करताना जिल्ह्यातील पदाधिकाऱ्यांना विश्‍वासात घेतले नसल्याने राष्ट्रवादीत धुसफूस सुरू झाली आहे. पक्षाचे अध्यक्ष शरद पवार यांच्यापर्यंत ही धुसफूस पोचवली जाणार आहे. श्री. जाधव हे जिल्हा बॅंकेचे उपाध्यक्ष आहेत. पक्षाचे जिल्हाध्यक्ष आहेत. अन्य काही पदे त्यांच्याकडे आहेत. असे असताना त्यांना हे पद दिले आहे. एका व्यक्तीवर कारभाराचा किती भार द्यायचा, एकाकडेच किती पदे द्यायची याचाही श्रेष्ठींनी विचार करायला हवा, अशी भूमिका मांडली जात आहे. 

जिल्ह्यातील अनेक पदाधिकारी जिल्हा नियोजनवर जाण्यास इच्छुक होते; मात्र पदाधिकाऱ्यांची थेट नावेच जाहीर केल्याने अनेकजणांची निराशा झाली. निवड कशा पद्धतीने झाली, याबाबत काहींनी चौकशीही केली. त्यामुळे नाराज झालेल्या माजी सभापती शौकत मुकादम यांनी आपली नाराजी थेट व्यक्त केली. ही पदे कुणी वाटली आणि कोणाच्या आदेशाने हे समोर आले पाहिजे अन्यथा आम्ही गप्प बसणार नाही, असा पवित्राच काही ज्येष्ठ नेत्यांनी घेतल्याचे शौकत मुकादम यांनी स्पष्ट केले. राष्ट्रवादी पक्ष ही कुणाची मालमत्ता नाही. कार्यकर्त्यांना विश्वासात न घेता निवड कशी केली असा सवाल मुकादम यांनी उपस्थित केला. कार्यकर्त्यांना जर किंमत नसेल तर आम्ही गप्प बसणार नाही, असा इशाराही त्यांनी दिला.

हेही वाचा - कुणकेश्वर यात्रेची सांगता; यंदा किनारा सुनासुना -

राजापूरपासून ते मंडणगडपर्यंत क्रियाशील कार्यकर्ता पक्षात नाही का स्वतः मेहनत घेऊन अनेक कार्यकर्त्यांनी ग्रामपंचायती राष्ट्रवादीच्या आणल्या आहेत; मात्र त्यांना सन्मान न देता आणि कार्यकर्त्यांना विश्वासात न घेता निवड केली गेली, हे दुर्दैव असल्याची प्रतिक्रिया कार्यकर्त्यांत व्यक्त होत आहेत.

"परस्पर निवड करणे हे योग्य नाही. कार्यकर्त्याच्या घामावर, मेहनतीवर पक्ष उभा राहतो; पदे मात्र त्याला मिळतच नाहीत. ज्यांच्याकडे पदांचा भरणा आहे त्यांनाच पुन्हा पदे दिली जातात. हे पूर्णतः चुकीचे असून आम्ही ते सहन करणार नाही."

- शौकत मुकादम, माजी सभापती